اسلام آباد:
قومي اسيمبلي جي ناڻي بابت اسٽينڊنگ ڪميٽي غير رجسٽرڊ دڪانن ۽ ڪاروبار لاءِ 5 سيڪڙو ود هولڊنگ ٽيڪس جي منظوري ڏئي ڇڏي، سيلز جي حد 2 ڪروڙ رپيا سالياني مقرر ڪئي وئي آهي.
ڪميٽي پي آءِ اي جي نجڪاري کانپوءِ نون جهازن ۽ ان جي پارٽس تي 15 سالن جي ٽيڪس ڇوٽ واري درخواست تي سخت خدشن جو اظهار ڪندي نجڪاري جي صلاحڪار محمد علي کي اسٽينڊنگ ڪميٽي جي اجلاس ۾ طلب ڪري ورتو.
اجلاس ۾ ايف بي آر عملدارن ٻڌايو ته هن وقت پي آءِ اي وٽ نون جهازن ۽ اسپيئر پارٽس تي هڪ سال جي ٽيڪس ڇوٽ آهي.
شرميلا فاروقي اعتراض ڪندي چيو ته 15 کان علاوه 5 سال مناسب ناهي. ناڻي واري سيڪريٽري چيو ته ان تجويز تي آءِ ايم ايف سان به مشاورت ڪئي وئي آهي.
ڪميٽي تجويز ڪيل ٽيڪس معافي جي منظوري کي ملتوي ڪري ڇڏيو، حڪومت کي اختيار ڏنو ته يا ته رعايت واپس وٺي يا ان کي سڀني ايئر لائنز تائين برابر وڌايو وڃي.
ناڻي واري سيڪريٽري چيو ته جيڪڏهن مراعتون منظور ڪيون ويون ته خريدار باضابطه طور تي جولاءِ جي وچ تائين ڊيل مڪمل ڪندا. پرائيويٽائيزيشن واري سيڪريٽري خبردار ڪيو ته جيڪڏهن حڪومت خريدارن کي مقرر ڪيل ٽيڪس مراعتون فراهم ڪرڻ ۾ ناڪام وئي ته ڊيل منسوخ ٿي سگهي ٿي.
اسٽينڊنگ ڪميٽي سيلز ٽيڪس ايڪٽ جي ٽئين شيڊول ۾ 21 مختلف ڪيٽيگريز تي مشتمل 116 وڌيڪ شيون شامل ڪرڻ جي منظوري ڏني. ان قدم سان ايف بي آر کي هر سال 50 ارب رپين جي اضافي آمدني جو امڪان آهي.
ايف بي آر عملدارن اعتراف ڪيو ته ڪجهه شين جي قيمتن ۾ 15 آگسٽ تائين واڌ ٿي سگهي ٿي، اجلاس نويد قمر جي صدارت هيٺ ٿيو. اجلاس ۾ آفيسرن چيو ته پرچون پيڪنگنگ ۾ وڪرو ٿيندڙ سامان تي سيلز ٽيڪس جي معلومات ڇپائڻ کي لازمي بڻائڻ جي تجويز ڏني وئي آهي.
ڪميٽي جي ميمبرن بندرگاهن تي پرائس ٽيگنگ جي عملييت تي به سوال اٿاريا ۽ ان ڳالهه جي جاچ ڪئي ته ايتري وڏي تعداد ۾ پروڊڪٽس جي ٽيگنگ ڪيئن ممڪن ٿي سگهي ٿي.
جاويد حنيف چيو ته 2.3 ٽريلين رپين کان وڌيڪ جون ٽيڪس ڇوٽون ڏنيون ويون آهن، ايف بي آر عملدارن جو چوڻ آهي ته حڪومت اٽڪل 4 هزار ارب رپين جون ٽيڪس ڇوٽون ختم ڪري ڇڏيون آهن ۽ موجوده ڇوٽون گهڻو ڪري ضروري شيون، دالون ۽ کاڌي پيتي تي آهن.
7 ريفائنريز لڳ ڀڳ 700 ملين ڊالرن جي سيڙپڪاري ڪرڻ وارا آھن، جنھن کي نظر ۾ رکندي درآمد ٿيل مشينري ۽ سامان تي سيلز ٽيڪس ڇوٽ جي تجويز جي منظوري ڏني وئي آھي.
اهڙي طرح ڪمرشل جهازن ۽ ٽينڪرز جي درآمد تي سيلز ٽيڪس ڇوٽ جي تجويز جي به منظوري ڏني وئي. منجهند جي وقفي کانپوءِ ٻيهر ٿيندڙ اجلاس ۾ ناڻي بابت اسٽينڊنگ ڪميٽي سوشل ميڊيا تان آمدني تي 5 سيڪڙو ود هولڊنگ ٽيڪس لاڳو ڪرڻ سميت ڪيترن ئي اهم تجويزن جي منظوري ڏني.
اجلاس ۾ برآمد ڪندڙن تي لاڳو هڪ سيڪڙو ايڊوانس ٽيڪس ختم ڪرڻ جي تجويز جي پڻ منظوري ڏني وئي. وراثت ۾ مليل ملڪيت جي بنيادي قيمت کي مالڪ جي موت کان پوءِ منتقلي جي تاريخ کان شمار ڪرڻ جي سفارش ڪئي وئي.
سينيٽ جي موسمياتي تبديلي بابت اسٽينڊنگ ڪميٽي ۾ شيري رحمان پي ايس ڊي پي تحت ماحولياتي منصوبن لاءِ مختص فنڊن جي کوٽ ۽ انهن جي سستي استعمال تي ڳڻتي جو اظهار ڪيو.
