ايران ۽ آمريڪا وچ ۾ ٽيڪنيڪل ڳالهيون سوئٽزرلينڊ ۾ پڄاڻي تي پهتي آهن، جتي ٻنهي ملڪن مستقبل ۾ ڳالهين کي اڳتي وڌائڻ لاءِ مختلف شعبن ۾ گڏيل ورڪنگ گروپ قائم ڪرڻ تي اتفاق ڪيو آهي.
ايران جي سرڪاري نيوز ايجنسي IRNA موجب ايران جي نائب پرڏيهي وزير ڪاظم غريب آبادي چيو آهي ته ڳالهين دوران اهو فيصلو ڪيو ويو ته اهم معاملن تي اڳڀرائي لاءِ چار الڳ ورڪنگ گروپ ٺاهيا ويندا.
ڪاظم غريب آبادي موجب، پهريون ورڪنگ گروپ اقتصادي پابنديون هٽائڻ، ٻيو ايٽمي مسئلن، ٽيون تعميراتي ۽ اقتصادي ترقي ۽ چوٿون معاهدي تي عملدرآمد ۽ نگراني سان معاملو ڪندو.
ايراني عملدارن جو چوڻ آهي ته انهن ورڪنگ گروپن جو مقصد ٻنهي ملڪن وچ ۾ طئي ٿيل ابتدائي فريم ورڪ تي عمل ڪرڻ ۽ تڪراري معاملن تي ٽيڪنيڪل پيش رفت کي ممڪن بڻائڻ آهي.
مبصرن موجب ورڪنگ گروپن جو قيام ان ڳالهه جو اشارو آهي ته ٻئي ڌريون ڳالهين جي عمل کي رڳو سياسي بيانن تائين محدود رکڻ بدران عملي ۽ ٽيڪنيڪل سطح تي اڳتي وڌائڻ چاهين ٿيون. خاص طور تي، ايٽمي پروگرام، اقتصادي پابندين ۾ نرمي، ايران جي منجمد اثاثن جي واپسي ۽ اقتصادي تعاون جا مسئلا ايندڙ ڳالهين ۾ مرڪزي اسٽيج وٺي سگهن ٿا.
اها پيش رفت هڪ اهڙي وقت ۾ سامهون آئي آهي جڏهن تازو آمريڪا-ايران مفاهمتي عمل کانپوءِ ٻنهي ملڪن جي لاڳاپن ۾ بهتري جون اميدون پيدا ٿي رهيون آهن پر ڪيترن ئي حساس معاملن تي اڃا وڌيڪ ڳالهين ۽ اتفاق راءِ جي ضرورت آهي.
