پاڪستان رائس فيسٽيول 2026 هالينڊ ۾ منعقد ڪيو ويو جنهن ۾ يورپ مان 100 کان وڌيڪ ڪاروباري ۽ کاڌي جي صنعت جي اڳواڻن شرڪت ڪئي.
تفصيل موجب هالينڊ ۾ پاڪستان جي سفير سيد حيدر شاهه پنهنجي خطاب ۾ چيو ته پاڪستاني باسمتي چانور دنيا جي 100 کان وڌيڪ ملڪن کي ايڪسپورٽ ڪيو پيو وڃي ۽ پنهنجي منفرد خوشبو، ڊگها اناج ۽ بهترين پچائڻ جي خاصيتن سبب عالمي صارفين، پرچون فروش ۽ کاڌي پيتي جي ماهرن ۾ مسلسل مقبوليت حاصل ڪري رهيو آهي.
ان موقعي تي ڳالهائيندي هالينڊ ۾ پاڪستان جي سفير سيد حيدر شاهه چيو ته پاڪستان زرعي ۽ کاڌي پيتي جي شين جي شعبي ۾ معيار، پائيداري، سراغ رسي ۽ عالمي فوڊ سيفٽي معيارن تي مڪمل عملدرآمد لاءِ پرعزم آهي.
پاڪستان جي سفير چيو ته پاڪستاني باسمتي رڳو هڪ زرعي پيداوار ناهي پر جيوگرافيڪل انڊيڪيشن (GI) طرفان محفوظ ڪيل هڪ منفرد برانڊ آهي جيڪو صدين جي زرعي ورثي ۽ عالمي معيار جي نمائندگي ڪري ٿو. هن چيو ته يورپي صارفين طرفان صداقت، معيار ۽ استحڪام تي وڌندڙ ڌيان پاڪستان لاءِ هڪ اهم موقعو آهي ۽ پاڪستان ان گهرج کي پورو ڪرڻ لاءِ هڪ قابل اعتماد واپاري پارٽنر بڻجڻ جي صلاحيت رکي ٿو.
پاڪستان رائس فيسٽيول 2026ع جي تقريب دوران پاڪستان ۽ هالينڊ جي وچ ۾ زرعي ۽ خوراڪ جي تعاون جي امڪانن بابت تفصيلي بريفنگ ڏني وئي، جڏهن ته 23 کان 26 نومبر تائين ڪراچي ۾ منعقد ٿيندڙ عالمي فوڊ ۽ زرعي نمائش ”فوڊ نمائش 2026“ کي پاڪستان جي ايندڙ ڪمرشل ميلي جي طور تي پيش ڪيو ويو.
تقريب ۾ آيل مهمانن کي پاڪستاني باسمتي چانورن مان تيار ڪيل روايتي ۽ جديد ڀاڄيون پڻ پيش ڪيون ويون. شرڪت ڪندڙن کي باسمتي چانورن جي جاگرافيائي سڃاڻپ، ڪوالٽي ايشورنس، ٽريڪ ايبلٽي سسٽم ۽ يورپي مارڪيٽ جي ضرورتن جي تعميل بابت پڻ تفصيلي ڄاڻ ڏني وئي.
هالينڊ يورپي يونين ۾ پاڪستان جي اهم برآمداتي مارڪيٽن مان هڪ آهي ۽ ٻنهي ملڪن جي وچ ۾ ٻطرفي واپار جو حجم لڳ ڀڳ 1.94 بلين آمريڪي ڊالرن تائين پهچي چڪو آهي. روٽرڊيم پورٽ ۽ ايمسٽرڊيم ايسڪس ايئرپورٽ پاڪستاني مصنوعات جي يورپي مارڪيٽن تائين پهچ ۾ اهم ڪردار ادا ڪري رهيا آهن.
پاڪستان رائس فيسٽيول 2026 سفارتخاني جي وسيع تر اقتصادي سفارتڪاري واري حڪمت عملي جو حصو آهي، جنهن جو مقصد پاڪستاني برآمدات کي فروغ ڏيڻ، بين الاقوامي واپاري پارٽنرشپ کي مضبوط ڪرڻ ۽ پاڪستان، هالينڊ ۽ يورپي مارڪيٽن وچ ۾ نوان ڪاروباري موقعا پيدا ڪرڻ آهي.
