اسلام آباد:
وزيراعظم جي صنعت ۽ پيداوار بابت خاص مددگار هارون اختر خان جو چوڻ آهي ته پاڪ چين ڀائيواري ملڪ ۾ نئين صنعتي انقلاب جو بنياد بڻجندي.
اهڙن خيالن جو اظهار هن سيگلز گروپ (پاڪستان) ۽ هيبي جوهانگ انرجي ٽيڪنالاجي گروپ (چائنا) جي وچ ۾ موون پِڪ هوٽل سينٽرورس اسلام آباد ۾ مفاهمت جي ياداشت (ايم او يو) تي صحيحن جي تقريب کي خطاب ڪندي ڪيو، جيڪو پاڪستان ۽ چين جي وچ ۾ صنعتي تعاون ۾ هڪ اهم سنگ ميل آهي.
ايم او يو تحت ترقي يافته ليٿيم آئن بيٽرين، انرجي اسٽوريج سسٽم، برقي گاڏين جي چارجنگ ڍانچي ۽ جديد صاف توانائي ٽيڪنالاجي جي شعبن ۾ تعاون کي فروغ ڏنو ويندو.
تقريب کي خطاب ڪندي هارون اختر خان سيگلز گروپ ۽ هيبي جوهانگ انرجي ٽيڪنالاجي گروپ کي ان تاريخي پارٽنرشپ تي مبارڪباد پيش ڪندي چيو ته هي قدم پاڪستان جي صنعتي ترقي، جديد ٽيڪنالاجي جي فروغ ۽ سيڙپڪاري ۾ واڌ لاءِ انتهائي اهم ثابت ٿيندو.
هارون اختر خان چيو ته چين منصوبابندي، مسلسل محنت ۽ اعليٰ معيار جي عزم ذريعي اليڪٽرڪ گاڏين، بيٽري ٽيڪنالاجي، قابل تجديد توانائي، مصنوعي ذهانت ۽ جديد صنعتي شعبن ۾ عالمي قيادت حاصل ڪئي آهي، جيڪا ترقي پذير ملڪن لاءِ مثال آهي. پاڪستان کي چين وانگر قابل اعتماد ڀائيواري سان مستقبل جي صنعتن جي تعمير تي فخر آهي.
هن چيو ته اسان رڪاوٽون نه پر سيڙپڪارن لاءِ سهولتون پيدا ڪري رهيا آهيون. پاڪستان ۾ ليٿيم آئن بيٽرين جي تياري ۽ ان کي گڏ ڪرڻ جو تجويز ڪيل منصوبو صرف هڪ سيڙپڪاري ناهي پر هڪ نئين صنعتي ماحوليات جو بنياد آهي جيڪو چيني ٽيڪنالاجي ۽ ماهرن کي پاڪستان جي صنعتي صلاحيت، ڪاروباري صلاحيتن ۽ جاگرافيائي اهميت سان ملائي ڇڏيندو.
هن چيو ته پاڪستان ۾ سولر انرجي جو استعمال تيزي سان وڌي رهيو آهي، جنهن ڪري قابل اعتماد انرجي اسٽوريج سسٽم جي ضرورت اڳي کان وڌيڪ وڌي وئي آهي. ترقي يافته ليٿيم آئن بيٽرين جي مقامي پيداوار درآمد جي انحصار کي گھٽائيندي، صاف توانائي جي فراهمي کي مضبوط ڪندي، اعلي معيار جي روزگار جا موقعا پيدا ڪندي، مقامي انجنيئرنگ جي صلاحيتن کي فروغ ڏيڻ ۽ صنعتي شعبن جي حمايت جي ترقي کي چالو ڪندي.
