ڪوئيٽا:
بلوچستان ۽ خيبرپختونخواهه جي سرحد تي ڪوچ اونڌي کاهي ۾ ڪري پئي، 40 مسافر فوت ۽ ڪيترائي زخمي ٿي پيا.
ڪوئيٽا کان پشاور ويندڙ مسافر ڪوچ بلوچستان ۽ خيبرپختونخواهه جي سرحد تي ڊانسر وٽ اونڌي کڏ ۾ ڪري پئي، خوفناڪ حادثو پيش آيو.
ريسڪيو ذريعن موجب حادثي ۾ 40 مسافر فوت ۽ 8 ڄڻا زخمي ٿي پيا آهن. فوتين ۽ زخمين ۾ عورتون ۽ ٻارڙا به شامل آهن.
حادثي جو اطلاع ملندي ئي شيراني ضلعي انتظاميه، ريسڪيو ٽيمون ۽ ايمبولينسون فوري طور تي واقعي واري هنڌ پهچي ويون، جڏهن ته خيبرپختونخواهه مان به امدادي عملو واقعي واري هنڌ پهچي ويو آهي.
https://x.com/faseehijaz1/status/2072919639802187891?s=20
ڊپٽي ڪمشنر شيراني حضرت ولي ڪاڪڙ موجب زخمين کي ريسڪيو ڪري ويجھن اسپتالن ۾ منتقل ڪيو پيو وڃي، جڏهن ته فوتين جا لاش ڪڍڻ لاءِ امدادي ڪارروايون جاري آهن.
حادثي کانپوءِ شيراني ۽ ڊيرا اسماعيل خان جي اسپتالن ۾ ايمرجنسي لاڳو ڪئي وئي آهي ته جيئن زخمين کي فوري ۽ بهتر طبي سهولتون فراهم ڪيون وڃن.
ريسڪيو 1122، فرنٽيئر ڪور (ايف سي)، پوليس، ضلعي انتظاميا ۽ ٻيا لاڳاپيل ادارا گڏيل طور تي ريسڪيو آپريشن ۾ حصو وٺي رهيا آهن.
سخت جبلن واري علائقي سبب امدادي ڪمن ۾ ڏکيائيون پيش اچي رهيون آهن پر ريسڪيو اهلڪارن پاران آپريشن جاري آهي. اختيارين موجب حادثي جا سبب معلوم ڪرڻ لاءِ جاچ شروع ڪئي وئي آهي.
https://youtu.be/-NGFxE7g0g?si=w2daivgIqBtnRSbh
مارجي ويلن جي سڃاڻپ ٿي آهي، 13 جو تعلق خيبرپختونخواهه سان آهي
ريسڪيو 1122 موجب ڊيرا اسماعيل خان کان ريسڪيو آپريشن ۾ 7 ايمبولينس، هڪ ريسڪيو گاڏي ۽ 30 کان وڌيڪ اهلڪارن حصو ورتو. حادثي ۾ 40 کان وڌيڪ ماڻهو اجل جو شڪار ٿيا، جن مان هن وقت تائين 32 ڄڻن جي سڃاڻپ ٿي چڪي آهي.
فوت ٿيل 32 ماڻهن ۾ 13 جو تعلق خيبرپختونخواهه، 2 جو تعلق خيبرپختونخواهه، 2 جو تعلق پشاور سان آهي، جڏهن ته وڌيڪ 9 ڄڻن جي سڃاڻپ جو عمل جاري آهي.
وزيراعظم افسوس جو اظهار ڪيو
ٻئي طرف وزيراعظم شهباز شريف بس حادثي ۾ قيمتي جانين جي نقصان تي افسوس جو اظهار ڪندي فوتين جي بلند درجات جي لاءِ دعا ڪئي آهي.
هن افسوسناڪ حادثي ۾ فوت ٿيندڙن جي وارثن سان دلي تعزيت جو اظهار ڪندي زخمين جي جلد صحتيابي لاءِ دعا ڪئي ۽ کين هر ممڪن طبي امداد فراهم ڪرڻ جي هدايت ڪئي.
ان کان علاوه بلوچستان جي وڏي وزير مير سرفراز بگٽي افسوسناڪ حادثي تي گهري ڏک ۽ افسوس جو اظهار ڪندي قيمتي انساني جانين جي ضايع ٿيڻ تي گهري ڏک ۽ افسوس جو اظهار ڪيو آهي.
هن چيو ته حادثي جو اطلاع ملندي ئي صوبائي حڪومت لاڳاپيل ادارن کي هدايتون جاري ڪيون آهن ته فوري طور تي ريسڪيو ۽ رليف ڪارروايون تيز ڪيون وڃن. ٻنهي صوبن جي ضلعي انتظاميا، ايف سي، ريسڪيو ادارا ۽ لاڳاپيل ادارا امدادي سرگرمين ۾ مصروف آهن، جڏهن ته زخمين کي بروقت ۽ بهترين طبي سهولتون فراهم ڪرڻ کي يقيني بڻايو پيو وڃي.
مير سرفراز بگٽي لاڳاپيل انتظامي عملدارن کي حادثي جي سببن جي تفصيلي جاچ ڪرڻ ۽ واقعي جي مڪمل جاچ ڪرڻ جي هدايت ڪندي چيو ته امدادي ڪاررواين ۾ ڪابه ڪسر نه ڇڏي وڃي، زخمين کي هر ممڪن طبي سهولتون فراهم ڪيون وڃن ۽ متاثر خاندانن جي هر ممڪن مدد ڪئي وڃي.
سرفراز بگٽي مارجي ويلن جي وارثن سان دلي تعزيت ۽ همدردي جو اظهار ڪندي زخمين جي جلد صحتيابي لاءِ دعا ڪئي ۽ چيو ته بلوچستان حڪومت هن ڏکئي وقت ۾ متاثر خاندانن سان گڏ آهي.
هوڏانهن پيپلز پارٽي جي چيئرمين بلاول ڀٽو زرداري بس حادثي تي افسوس جو اظهار ڪندي چيو آهي ته ژوب جي ڊنسر واري علائقي ۾ پيش آيل حادثي ۾ قيمتي جانين جو ضايع ٿيڻ افسوس جوڳو آهي. هن چيو ته منهنجي همدردي انهن خاندانن سان آهي جيڪي پنهنجا پيارا وڃائي ويٺا آهن.
بلاول ڀٽو چيو ته کيس يقين آهي ته لاڳاپيل اختياريون حادثي ۾ زخمي ٿيلن جي بهتر علاج کي يقيني بڻائيندا. بس حادثي ۾ زخمي ٿيندڙن جي جلد صحتيابي لاءِ دعاگو آهيان.
