ڪراچي:
ناڻي واري وفاقي وزير محمد اورنگزيب چيو آهي ته نجڪاري ڪميشن لاءِ 28 وڌيڪ رياستي ادارا مختص ڪيا ويا آهن، حڪومت نجڪاري جي حوالي سان سرگرم آهي.
پاڪستان بئنڪس ايسوسي ايشن جي تحت پاڪستان بئنڪنگ سمٽ 2026ع جي افتتاحي تقريب کي خطاب ڪندي ناڻي واري وزير چيو ته گذريل مالي سال مضبوط معاشي استحڪام سان ختم ٿيو، وڏين صنعتن جي ترقي سبب جي ڊي پي 3.7 سيڪڙو رڪارڊ ڪئي وئي، مالي سال 26 ۾ ترسيل جي ڪري ڪرنٽ اڪائونٽ مستحڪم رهيو.
ناڻي واري وزير چيو ته مالي سال 26ع ۾ 41 کان 42 ارب ڊالرن جي ترسيل جو اندازو لڳايو ويو آهي. قيمتي اضافو برآمد پڻ اقتصادي استحڪام ۾ اهم ڪردار ادا ڪيو آهي. مالي سال 26 ۾ پاڪستان جا پرڏيهي مٽا سٽا جا ذخيرا 18.4 ارب ڊالرن تائين پهچي ويا.
ناڻي واري وزير محمد اورنگزيب چيو ته گذريل مالي سال پاڪستان اسٽاڪ ايڪسچينج ۾ 11 آءِ پي اوز منعقد ڪيا ويا، نوان سيڙپڪار خاص طور جين زيڊ اسٽاڪ مارڪيٽ ۾ دلچسپي رکن ٿا. 2025ع جي ٻوڏن عالمي امداد جي طلب نه ڪئي جيئن 2022ع ۾ 2025ع وارين ٻوڏن کي پنهنجي وسيلن مان منظم ڪيو.
ناڻي واري وزير چيو ته وفاقي بجيٽ ۾ 50 ڪروڙ کان گهٽ ماليت جي ڪاروبار تي سپر ٽيڪس ختم ڪيو ويو آهي، سپر ٽيڪس جو خاتمو ننڍن ڪاروبارن جي ترقي لاءِ ناگزير هو، بجيٽ ۾ تعميراتي شعبي کي رليف ڏنو ويو آهي، زرعي مشينري تي ڊيوٽي گهٽائي صفر ڪئي وئي آهي، ريٽيل سيڪٽر کي ايڪسپورٽ ٽيڪس جي دائري ۾ شامل ڪيو ويو آهي. ٽيڪنالاجي جي واڌاري سان ٽيڪس نظام ۾ انساني لاڳاپن کي ختم ڪري ٽيڪس انتظاميه جو اعتماد بحال ڪرڻ لاءِ ٺوس قدم کڻڻا پوندا.
محمد اورنگزيب چيو ته حتمي ٽيڪس حڪومت لاءِ ممڪن ناهي، نظام کي آسان بڻائڻ چاهيون ٿا، پاڪستان جهڙي آبادي واري ملڪ ۾ هر ڪنهن کي مناسب ٽيڪس ادا ڪرڻو پوندو. هن چيو ته بحري معاملن واري وزارت کي ڏسڻو آهي ته ٽرانس شپمينٽ کي ڪيئن وڌايو وڃي. گذريل 3 مهينن ۾ روشن ڊجيٽل اڪائونٽس جو ماهوار انفلوز 18 ملين ڊالرن مان وڌي 300 ملين ڊالر ٿي ويو آهي.
ناڻي واري وزير چيو ته ايس ايم ايز جي سرمائي تائين پهچ بيانن تائين محدود نه هجڻ گهرجي، وڏن ڪاروبارن کي ڀليڪار ڪيون ٿا پر بجيٽ ۾ ايس ايم ايز لاءِ خاص حصو مختص ڪيو ويو آهي.
هن چيو ته آرٽيفيشل انٽيليجنس، بلاڪ چين ۽ ورچوئل اثاثن جي مٽا سٽا واري ڪمپنين کي ڊسمبر 2025ع ۾ اين او سي جاري ڪيا ويا، جنهن ريت معيشت ترقي ڪري رهي آهي، ڪمرشل بئنڪ سائبر سيڪيورٽي کي يقيني بڻائين، گورنر اسٽيٽ بئنڪ سائبر سيڪيورٽي بابت اڳڀرائي ڪري.
ميڊيا سان ڳالهائيندي ناڻي واري وزير چيو ته ايران آمريڪا جنگ کانپوءِ ايران سان واپار شروعاتي مرحلن ۾ آهي. هن چيو ته اميد آهي ته ايران سان واپار ۾ اهم اڳڀرائي ٿيندي. پاڪستان لاءِ ضروري آهي ته اسلامي برادر ملڪن سان لاڳاپا وڌائڻ. صوبن جو شڪر گذار آهيان ته انهن ترقياتي بجيٽ جي حوالي سان وفاق سان تعاون ڪيو، اين ايف سي بابت بحث اڃا جاري آهي.
اجلاس کي خطاب ڪندي ناڻي واري مملڪتي وزير بلال اظهر ڪياني چيو ته بينڪنگ سيڪٽر معيشت جي ترقي ۾ اهم ڪردار ادا ڪري رهيو آهي. حڪومت بئنڪنگ سسٽم جي ترقي لاءِ موثر قدم کڻي رهي آهي.
پي بي اي جي چيئرمين ظفر مسعود ڳالهائيندي چيو ته ڪمرشل بئنڪن گذريل هڪ سال ۾ ڪيترائي سنگ ميل عبور ڪيا آهن، 1953ع ۾ قائم ٿيل پاڪستان بئنڪس ايسوسيئيشن ڊسمبر 2025ع ۾ بيلٽ باڪس ذريعي ايگزيڪيوٽو ڪميٽي جون چونڊون ڪرايون.
هن چيو ته پاڪستان بئنڪس ايسوسي ايشن جي ايگزيڪيوٽو ڪميٽي ۾ 2 عورتن کي به شامل ڪيو ويو آهي، بئنڪنگ سيڪٽر ايس ايم ايز، زراعت ۽ ماحوليات تي سرگرم عمل آهي، پاڪستان جي بئنڪنگ انڊسٽري سڀ کان وڌيڪ ٽيڪس ادا ڪندي آهي جيڪو ساليانو هڪ هزار ارب رپين کان وڌيڪ آهي.
ظفر مسعود چيو ته گذريل هڪ سال ۾ زرعي شعبي جي قرضن ۾ 39 سيڪڙو اضافو ٿيو آهي، هائوسنگ قرضن ۾ 90 سيڪڙو اضافو ٿيو آهي، ايس ايم اي قرض وٺندڙن جي واڌ ۾ ساليانو 111 سيڪڙو اضافو ٿيو آهي.
هن چيو ته هڪ سال ۾ ايس ايم ايز کي ڏنل قرضن جي قيمت ۾ 80 سيڪڙو اضافو ٿيو آهي، هو اسٽيٽ بئنڪ جي سهڪار سان بئنڪنگ شعبي جي افرادي قوت کي تربيت ڏئي رهيا آهن، تعليمي ادارن کي گذارش آهي ته ٽريننگ جي حوالي سان بئنڪن کي سهڪار فراهم ڪيو وڃي.
ظفر مسعود چيو ته گذريل سال بئنڪن اربين رپين جا قرض جاري ڪيا. بجلي جا گردشي قرض ختم ڪرڻ لاءِ 2400 ارب رپيا، بئنڪن اربين رپين جا قرض جاري ڪري ڇڏيا. پي آءِ اي جي نجڪاري لاءِ خانگي شعبي کي 300 ارب رپيا ڏنا ويا آهن.
