ڊپٽي وزيراعظم اسحاق ڊار جي صدارت هيٺ بندرگاهن جي رابطن کي بهتر بڻائڻ بابت اعليٰ سطحي اجلاس ٿيو، جنهن ۾ سامونڊي معاملن واري سيڪريٽري پاران پاڪستاني بندرگاهن جي موجوده صورتحال ۽ گنجائش بابت تفصيلي بريفنگ ڏني وئي.
اسحاق ڊار چيو ته پاڪستان جي جاگرافيائي بيهڪ هڪ اثاثو آهي، ان مان فائدو کڻڻ جي ضرورت آهي، پاڪستان لاڳاپا بهتر ڪري وڌ کان وڌ اقتصادي فائدا حاصل ڪري سگهي ٿو.
ڪميٽي پاڪستان جي بندرگاهن جي ترقي، ڪارڪردگي ۽ مقابلي جي صلاحيت کي وڌائڻ جي قدمن جو جائزو ورتو، اجلاس ۾ بندرگاهن جي رابطن کي بهتر بڻائڻ، آپريشن کي منظم ڪرڻ ۽ ايجنسين جي وچ ۾ رابطا مضبوط ڪرڻ تي غور ڪيو ويو.
علائقائي واپاري گيٽ ويز جي طور تي بندرگاهن کي مضبوط ڪرڻ لاءِ واپار، لاجسٽڪ ۽ سڌارن جي سهولتن تي به ڳالهه ٻولهه ڪئي وئي.
اجلاس ۾ قانون ۽ انصاف واري وفاقي وزير، سمندري معاملن واري وفاقي وزير، خصوصي معاون طارق باجوه، سيڪريٽري بحري معاملن، ڊي جي اين ايل سي، چيئرمين ڪراچي پورٽ ٽرسٽ ۽ لاڳاپيل کاتن جي اعليٰ عملدارن شرڪت ڪئي.
