تهران:
آمريڪي هوائي حملن کانپوءِ ايران دعويٰ ڪئي آهي ته هن جوابي ڪارروائي ۾ بحرين ۽ ڪويت ۾ آمريڪي فوجي اڏن کي ڊرون حملن سان نشانو بڻايو.
ايراني فوج موجب بحرين ۾ سخير فوجي اڏي تي آمريڪي هيلي ڪاپٽرن ۽ جاسوس جهازن کي ڊرونز ذريعي نشانو بڻايو ويو. جڏهن ته، هن دعوي جي اڃا تائين آزاد ذريعن طرفان تصديق نه ڪئي وئي آهي.
ٻئي طرف روسي ميڊيا جي رپورٽن ۾ چيو ويو آهي ته ڪويت ۾ ايراني ڊرون حملن دوران آمريڪي ميزائل دفاعي نظام جي بيٽري کي نشانو بڻايو، جنهن کانپوءِ علائقي ۾ دونهين جا بادل اڀرندي نظر آيا.
ٻئي طرف ڪويت جي فوج پنهنجي بيان ۾ چيو آهي ته ملڪ جو فضائي دفاعي نظام دشمن جي ميزائلن ۽ ڊرونز کي ناڪام بڻائڻ لاءِ سرگرم آهي ۽ صورتحال جي مسلسل نگراني ڪئي پئي وڃي.
نيوز ايجنسي ڪويت جي بچاءَ واري وزارت جي حوالي سان ٻڌايو آهي ته حملن دوران ملڪ ۾ ڪيترن ئي اهم تنصيبات کي نشانو بڻايو ويو، جنهن جي نتيجي ۾ مالي نقصان ٿيو، پر جاني نقصان بابت فوري تفصيل جاري نه ڪيا ويا.
