واشنگٽن: آمريڪي نائب صدر جي ڊي وينس چيو آهي ته اسرائيل آمريڪا ۾ عوامي راءِ جي جنگ هارائي رهيو آهي ۽ اها هڪ سادي، واضح ۽ ناقابل بيان حقيقت بڻجي چڪي آهي.
مشهور پوڊ ڪاسٽر جو روگن کي ڏنل انٽرويو ۾ آمريڪي نائب صدر چيو ته اسرائيل آمريڪا جو اهم اتحادي آهي پر هو آمريڪي سياست تي اثرانداز ٿيڻ جي ڪوشش به ڪندو آهي.
ڳالهه ٻولهه دوران جڏهن پڇيو ويو ته ڇا اسرائيل آمريڪي سياست تي اثرانداز ٿيڻ جي ڪوشش ڪري ٿو، جي ڊي وينس جواب ڏنو ته ها، اسرائيل يقيناً ان حوالي سان ڪافي اثرائتو آهي.
هن چيو ته جيتوڻيڪ آمريڪا ۽ اسرائيل وچ ۾ ويجها لاڳاپا آهن پر اسرائيل بابت آمريڪي عوام جي راءِ تيزي سان تبديل ٿي رهي آهي جنهن جا مستقبل جي سياست تي اثر پئجي سگهن ٿا.
ٻئي طرف تازو سروي رپورٽون پڻ ظاهر ڪن ٿيون ته آمريڪا ۾ اسرائيل لاءِ عوامي حمايت ۾ نمايان طور تي گهٽتائي آئي آهي. آمريڪي ميڊيا جي سروي موجب رڳو 32 سيڪڙو آمريڪن اسرائيل بابت مثبت راءِ رکن ٿا، جڏهن ته 39 سيڪڙو منفي راءِ رکن ٿا.
رپورٽ موجب گذريل ڪجهه سالن دوران آمريڪي عوام جي رويي ۾ واضح تبديلي آئي آهي. اسرائيل جي حمايت ۾ اهم گهٽتائي رڪارڊ ڪئي وئي آهي، خاص طور تي ڊيموڪريٽڪ پارٽي جي حمايت ڪندڙن، آزاد ووٽرن ۽ نوجوانن جي وچ ۾.
انگن اکرن موجب 2013ع ۾ جتي 34 سيڪڙو ماڻهو اسرائيل نواز هئا، اها شرح گهٽجي 17 سيڪڙو ٿي وئي آهي. ماهرن موجب غزه ۾ جنگ، وچ اوڀر جي صورتحال ۽ آمريڪا جي اندروني سياسي بحث جو عوامي راءِ تي گهرو اثر پيو آهي.
سياسي تجزيه نگارن جو چوڻ آهي ته آمريڪي نائب صدر جو اهو بيان هڪ اهڙي وقت ۾ سامهون آيو آهي جڏهن آمريڪا ۾ اسرائيل لاءِ پاليسين ۽ عوام جي حمايت تي هڪ نئون بحث هلي رهيو آهي، جنهن جا اثر مستقبل ۾ آمريڪي پرڏيهي پاليسي تي به پئجي سگهن ٿا.
