ڪراچي:
حڪومت پيٽروليم مصنوعات مهانگي ڪرڻ کانپوءِ گڊز ٽرانسپورٽرن ڀاڙن ۾ واڌ جو اعلان ڪري ڇڏيو.
پاڪستان گڊز ٽرانسپورٽ الائنس جي صدر ملڪ شهزاد اعواڻ پيٽروليم شين جي اگهن ۾ واڌ تي وڊيو بيان جاري ڪندي چيو آهي ته پاڪستان جا ٽرانسپورٽر ان فيصلي جي سخت مذمت ڪري رهيا آهن.
هن اعلان ڪيو ته وڌندڙ لاڳت سبب سڄي ملڪ ۾ مال برداري جي ڀاڙن ۾ 10 سيڪڙو اضافو ڪيو پيو وڃي.
ملڪ شهزاد اعواڻ چيو ته وفاقي حڪومت جي غلط پاليسين سبب لکين ٽرانسپورٽر بيروزگاري جو شڪار آهن. هن چيو ته حڪومت کي بار بار مطالبو ڪيو ويو آهي ته جيڪڏهن پيٽروليم شين جي قيمتن ۾ اضافو ناگزير آهي ته گهٽ ۾ گهٽ ٽول ٽيڪس ۽ ٻيا اضافي ٽيڪس ختم ڪيا وڃن ته جيئن ٽرانسپورٽرن کي ڪجهه رليف ملي سگهي.
هن مطالبو ڪيو ته موٽر وي پوليس، ٽريفڪ پوليس ۽ ٻين ادارن جا سمورا چالان ختم ڪيا وڃن ۽ ود هولڊنگ ٽيڪس ۾ به رليف ڏنو وڃي. هن وڌيڪ چيو ته وفاقي حڪومت پاران ڏنل سبسڊي ڪافي نه آهي جڏهن ته ڊيزل ۽ پيٽرول جي اگهن ۾ واڌ سان ٽرانسپورٽرن جا خرچ وڌي ويا آهن.
ملڪ شهزاد اعواڻ چيو ته ملڪ جي نازڪ صورتحال کي نظر ۾ رکندي ٽرانسپورٽر ملڪي مفاد کي نظر ۾ رکندي گاڏيون هلائي رهيا آهن ته جيئن ٽرانسپورٽ جو ڦيٿو نه رڪجي.
هن سيز فائر ۾ پاڪستان جي اهم ڪردار کي ساراهيندي فيلڊ مارشل عاصم منير کي خراج تحسين پيش ڪندي چيو ته حڪومت کي پنهنجي پاليسين تي نظرثاني ڪرڻ گهرجي ته جيئن ملڪ ۾ ٽرانسپورٽ جو نظام بغير ڪنهن وقفي جي جاري رهي سگهي.
