سعودي عرب ۾ حج 2026ع لاءِ سڄي دنيا مان آيل حاجين جو انگ 1 لک 18 هزار کان وڌي ويو آهي.
سعودي حج ۽ عمره واري وزارت موجب مختلف ملڪن مان زائرين جي آمد جو سلسلو تيزي سان جاري آهي، جڏهن ته مڪي، مديني ۽ مشاعري ۾ انتظامن کي حتمي شڪل ڏني پئي وڃي.
اختيارين موجب هن سال زائرين جي سهولت لاءِ جديد ٽيڪنالاجي، ڊجيٽل نگراني، طبي سهولتن ۽ ٽرانسپورٽ سسٽم کي وڌيڪ بهتر ڪيو ويو آهي. سعودي سول ڊفينس، ريڊ ڪريسنٽ ۽ سيڪيورٽي ادارا پڻ ايمرجنسي کي منهن ڏيڻ لاءِ هاءِ الرٽ آهن.
سعودي گهرو وزارت به غير قانوني حج ۽ بنا اجازت مڪي ۾ داخل ٿيندڙن خلاف سخت ڪارروائي جو اعلان ڪيو آهي. اهلڪارن جو چوڻ آهي ته حج انتظامن کي محفوظ ۽ منظم رکڻ لاءِ سخت نگراني جاري رهندي.
ٻئي طرف سڄي دنيا مان حاجين جو وڏو انگ مسجد الحرام ۽ مسجد نبوي ۾ عبادات ۽ تيارين ۾ مصروف آهي، جڏهن ته سعودي اختيارين موجب ايندڙ ڪجهه ڏينهن ۾ لکين وڌيڪ حاجين جي آمد جو امڪان آهي.
