ڪراچي:
شهر قائد جي علائقي ابراهيم حيدري ۾ پوليس ۽ جوابدارن وچ ۾ مبينا مقابلو ٿي پيو، جنهن جي نتيجي ۾ هڪ ڦورو زخمي حالت ۾ گرفتار ٿي ويو، جڏهن ته سندس ساٿي فرار ٿيڻ ۾ ڪامياب ٿي ويو.
پوليس موجب مقابلو معمول جي گشت دوران ٿيو، جڏهن جوابدارن کي روڪڻ جو اشارو ڪيو ته جوابدارن فائرنگ ڪري ڏني.
جوابي ڪارروائي ۾ هڪ جوابدار زخمي ٿي پيو، جنهن کي گرفتار ڪري ورتو.
گرفتار جوابدار جي سڃاڻپ عبدالعزيز جي نالي سان ٿي آهي، جنهن کي فوري طور تي جناح اسپتال منتقل ڪيو پيو وڃي، جتي کيس طبي امداد ڏني پئي وڃي.
پوليس جو چوڻ آهي ته جوابدارن جي قبضي مان هٿيار، موبائل فون ۽ نقدي پڻ هٿ ڪئي وئي آهي، جڏهن ته فرار ٿيل ساٿي جي ڳولا لاءِ علائقي ۾ سرچ آپريشن ڪيو پيو وڃي.
