ڪراچي:
ايس آءِ يو (اسپيشل انويسٽيگيشن يونٽ) پوليس ڳجهي اطلاع تي ڪارروائي ڪندي شهر قائد جي ڪورنگي انڊسٽريل ايريا ۾ جوابدارن سان مقابلو ڪيو، جنهن دوران ٻن جوابدارن کي زخمي حالت ۾ گرفتار ڪيو ويو.
ايس آءِ يو اختيارين موجب ڪارروائي انتهائي گهربل ڌاڙيل جي موجودگي جي اطلاع تي ڪئي وئي.
پوليس جي ٽيم جيئن ئي جوابدارن کي گهيرو ڪرڻ جي ڪوشش ڪئي ته هنن فائرنگ شروع ڪري ڏني، جنهن تي پوليس به جوابي فائرنگ ڪئي.
فائرنگ جي نتيجي ۾ 2 جوابدار زخمي ٿي پيا، جن کي فوري طور تي حراست ۾ ورتو ويو.
پوليس جو چوڻ آهي ته گرفتار جوابدارن وٽان هٿيار ۽ موٽرسائيڪل پڻ هٿ ڪئي وئي آهي، جيڪا وارداتن ۾ استعمال ٿيڻ جو امڪان آهي.
اختيارين موجب گرفتار جوابدارن جي سڃاڻپ جو عمل جاري آهي ۽ سندن خلاف قانوني ڪارروائي ڪئي پئي وڃي.
پوليس جو وڌيڪ چوڻ هو ته جوابدار جي ٻين ساٿين ۽ ڏوهن جي نيٽ ورڪ بابت به جاچ ڪئي پئي وڃي.
