اسرائيل آمريڪا کان جديد جنگي جهاز خريد ڪرڻ جي وڏي منصوبي جي منظوري ڏئي ڇڏي آهي، جنهن ۾ لاک هيڊ مارٽن ۽ بوئنگ کان F-35 ۽ F-15IA جهاز شامل آهن.
اسرائيلي دفاع واري وزارت موجب، ڊيل کي وزارتي ڪميٽي فار پروڪيورمينٽ پاران منظور ڪيو ويو، جيڪو اسرائيلي فوج کي مضبوط ڪرڻ لاءِ 350 بلين شيڪل (اٽڪل 119 بلين ڊالر) جي وسيع دفاعي منصوبي جو پهريون حصو آهي.
معاهدي تحت اسرائيل لاڪ هيڊ مارٽن کان F-35 جهاز جو چوٿون اسڪواڊرن ۽ بوئنگ کان F-15IA جهاز جو ٻيو اسڪواڊرن خريد ڪندو. آفيسرن موجب اهي نوان اسڪواڊرن ڊگهي مدي واري فوجي حڪمت عملي جو اهم حصو هوندا، جنهن جو مقصد علائقائي خطرن کي منهن ڏيڻ ۽ فضائي برتري برقرار رکڻ آهي.
اسرائيلي وزيراعظم بينجمن نتنياهو چيو آهي ته وڌايل دفاعي بجيٽ جو وڏو حصو پرڏيهي انحصار کي گهٽائڻ لاءِ گهرو هٿيارن تي خرچ ڪيو ويندو. هن اهو پڻ اشارو ڪيو ته اسرائيل مستقبل ۾ جديد جهاز ٺاهڻ جي صلاحيت وڌائڻ چاهي ٿو.
اسرائيلي دفاع واري وزارت جي ڊائريڪٽر جنرل امير بارام موجب، فوري جنگي ضرورتن سان گڏ ايندڙ 10 سالن ۽ ان کان پوءِ لاءِ فوجي برتري کي يقيني بڻائڻ ضروري آهي. هن چيو ته تازو علائقائي ڇڪتاڻ خاص طور تي ايران سان تڪرار جديد فضائي طاقت جي اهميت کي وڌيڪ اجاگر ڪيو آهي.
ماهرن موجب اهو فيصلو وچ اوڀر ۾ دفاعي توازن کي متاثر ڪري سگهي ٿو ۽ خطي ۾ هٿيارن جي ڊوڙ تيز ٿي سگهي ٿي.
