تهران: ايران جي پاسداران انقلاب آمريڪا کي سخت وارننگ ڏيندي چيو آهي ته جيڪڏهن ايراني آئل ٽينڪرز کي نشانو بڻايو ويو ته خطي ۾ آمريڪي تنصيبات ۽ فوجي هدفن تي حملا ڪيا ويندا.
ايران جي سرڪاري خبرن جي ايجنسي موجب IRGC ايئر اسپيس فورس جي ڪمانڊر پنهنجي بيان ۾ چيو ته ايران جا ميزائل ۽ جديد ڊرون مڪمل طور تي تيار آهن ۽ ڪنهن به جارحاڻي ڪارروائي جو فوري طور تي جواب ڏيڻ جي صلاحيت رکن ٿا.
هن چيو ته ايراني فوجون نه رڳو آمريڪي فوجي اڏن پر خطي ۾ دشمن جي جنگي جهازن کي به نشانو بڻائي سگهن ٿيون. هن چيو ته ايران پنهنجي تيل جي شپنگ ۽ قومي مفادن جي تحفظ لاءِ هر ممڪن قدم کڻندو.
ٻئي طرف ايراني خبرن جي ايجنسي دعويٰ ڪئي آهي ته آمريڪا پاڪستاني ثالثن ذريعي ايران کي جنگ بندي ۾ واڌ بابت نئين تجويز موڪلي آهي.
رپورٽن مطابق ٻنهي ملڪن وچ ۾ اڻ سڌي طرح سفارتي رابطا جاري آهن ۽ خطي ۾ ڇڪتاڻ گهٽائڻ لاءِ ڪوششون جاري آهن.
ماهرن جو چوڻ آهي ته آبنائے هرمز ۾ جاري ڇڪتاڻ ۽ آمريڪي بحريه جي سرگرمين سبب وچ اوڀر جي صورتحال انتهائي حساس ٿي وئي آهي. ايران اڳ ۾ ئي واضح ڪري چڪو آهي ته جيڪڏهن ان جي تيل جي برآمدات يا شپنگ لين کي نقصان پهتو ته هو سخت جواب ڏيندو.
ياد رهي ته گذريل ڪجهه هفتن کان آمريڪا ۽ ايران وچ ۾ ڇڪتاڻ وڌي رهي آهي جڏهن ته ان ڇڪتاڻ سبب عالمي منڊي ۾ تيل جي قيمتن ۾ به سخت لاٿ اچي رهي آهي.
