اسلام آباد:
وفاقي آئيني عدالت ليه جي رهواسي جي آن لائين بينڪ فراڊ ڪيس ۾ خانگي بئنڪ جي اپيل رد ڪندي رقم واپس ڪرڻ جي هدايت ڪئي.
جسٽس عامر فاروق جي سربراهي ۾ 2 رڪني بينچ ڪيس جي ٻڌڻي ڪئي. ٻڌڻي دوران جسٽس عامر فاروق رمارڪس ڏنا ته سڀ هيڪرز بئنڪن جي سسٽم ۾ موجود آهن. جيترو دير ۾ اڪائونٽ کوليو ويندو آهي، هيڪرز اڳ ۾ ڊيٽا حاصل ڪندا آهن. اهو بئنڪ جو فرض آهي ته هو پنهنجي نظام کي مضبوط ڪري.
جسٽس عامر فاروق وڌيڪ چيو ته منهنجو به هڪ خانگي بئنڪ ۾ اڪائونٽ هو، مون کي به فراڊ جو فون آيو. مون کي چيو ويو ته مليل OPT شيئر ڪريو ٻي صورت ۾ اڪائونٽ بلاڪ ڪيو ويندو. اڪائونٽ ۾ 3، 4 سالن کان ڪا ٽرانزيڪشن ناهي ٿي، ان ڪري بند ڪرڻ جو چيو.
ٻڌڻي دوران جسٽس عامر فاروق چيو ته مان آن لائين اڪائونٽ استعمال نٿو ڪريان. ڪيڏانهن وڃن غريب عوام؟ الائونس مان پئسا ڪيئن آيا؟ عدالت نشاندهي ڪئي ته بينڪنگ محتسب، صدر ۽ هاءِ ڪورٽ اڳ ئي بينڪ خلاف فيصلو ڏئي چڪا آهن.
بينڪ جي وڪيل عدالت ۾ دليل ڏيندي چيو ته ٽرانزيڪشن شهري پاڻ ئي ايپ ذريعي ڪئي. شهري موقف اختيار ڪيو ته سندس نمبر چوري ٿي ويو آهي.
واضح رهي ته ليه جي هڪ رهواسي جي اڪائونٽ مان 2022ع ۾ 15 لک 34 هزار رپيا ڪڍيا ويا هئا، بينڪنگ محتسب، صدر ۽ هاءِ ڪورٽ اڳ ئي بينڪ خلاف فيصلو ڏئي چڪي هئي، جنهن کانپوءِ معاملو وفاقي آئيني عدالت ۾ پهچي ويو هو.
