واشنگٽن:
آمريڪي ڪانگريس ۾ ٿيل ٻڌڻي دوران دعويٰ ڪئي وئي آهي ته ايران سان مبينا جنگي صورتحال ۾ آمريڪي هوائي فوج کي وڏو نقصان پهتو، جنهن موجب 39 جنگي جهاز تباهه ڪيا ويا.
سينيٽ ڪميٽي جي اجلاس ۾ ڊيموڪريٽڪ ڪانگريس ميمبر ايڊورڊ ڪيس پينٽاگون جي چيف فنانشل آفيسر جيئي هرسٽ کان سخت سوال ڪيا پر هن ان حوالي سان واضح جواب ڏيڻ کان پاسو ڪيو ۽ ڪيترن ئي سوالن تي مبهم موقف اختيار ڪيو.
پنهنجي تقرير ۾، ڪانگريسي آمريڪي دفاعي رپورٽنگ ويب سائيٽ دي وار زون جو حوالو ڏنو، جنهن ۾ دعويٰ ڪئي وئي آهي ته آمريڪي هوائي فوج 39 ڏينهن واري مبينا جنگ دوران لڳ ڀڳ 13,000 جهاز اڏايا.
رپورٽ موجب مختلف قسم جي جهازن ۽ ڊرونز کي نقصان پهچايو ويو، جن ۾ 24 ايم ڪيو 9 ريپر ڊرون، ڪيترائي ايف 15 ۽ اي 10 فائٽر جهاز شامل آهن.
وڌيڪ دعويٰ ڪئي وئي آهي ته جديد پنجين نسل جو ايف 35 اي جهاز به ايران جي فضائي حدن ۾ ڪري تباهه ٿيو پر پائليٽ محفوظ رهيو. اهڙي طرح ڪويت جي فضائي حدن ۾ ڪجهه جهاز به تباهه ٿيا.
رپورٽ ۾ اهو به چيو ويو آهي ته آمريڪي فوجي اثاثن کي مخالف قوتن جي هٿن ۾ وڃڻ کان روڪڻ لاءِ تباهه ڪيو ويو. بهرحال، انهن دعوائن جي آزاد ذريعن کان تصديق نه ٿي سگهي.
