ايران تي آمريڪا ۽ اسرائيل جي حملن کان پوءِ سڄي دنيا پيٽرول جي کوٽ کي منهن ڏئي رهي آهي، جنهن سبب قيمتون آسمان سان ڳالهيون ڪرڻ لڳيون آهن ۽ مهانگائي هوشياريءَ جي ور چڙهيل آهي.
عالمي خبرون ڏيندڙ اداري موجب ڪيوبا هن وقت توانائي جي بدترين بحران کي منهن ڏئي رهيو آهي. تيل جي شديد کوٽ سبب ملڪ جا وڏا علائقا اونداهي ۾ غرق ٿي ويا.
پيٽرول جي شديد کوٽ جو اعتراف ڪندي حڪومت عوام کي صبر جي اپيل ڪئي آهي. تيل جي بحران سبب بجلي جي پيداوار ۾ وڏي گهٽتائي آئي آهي.
ڪيوبا جي توانائي واري وزير هڪ پريس ڪانفرنس ۾ اعتراف ڪيو ته ملڪ ۾ ڪو به ٻارڻ، تيل يا ڊيزل ناهي.
هن چيو ته حڪومت هن وقت رڳو مقامي گئس ۽ ملڪي سطح تي پيدا ٿيندڙ خام تيل تي ڀاڙي رهي آهي پر اها رقم قومي ضرورتن کي پورو ڪرڻ لاءِ ڪافي ناهي.
توانائي واري وزير وڌيڪ چيو ته آمريڪي پابندين ۽ پرڏيهي دٻاءَ سبب ڪيوبا کي ٻاهرين ملڪ مان تيل وٺڻ ۾ سخت مشڪلاتن کي منهن ڏيڻو پئجي رهيو آهي، جنهن سبب بجلي جو نظام سخت دٻاءُ ۾ اچي ويو آهي.
ملڪ جي مشرقي علائقن ۾ وڏي پئماني تي بجلي بند ٿيڻ سبب لکين ماڻهو متاثر ٿيا، جڏهن ته ڪجهه علائقن ۾ 19 ڪلاڪن تائين بجلي بند رهڻ جا اطلاع آهن. ڪيترن ئي صوبن ۾ بليڪ آئوٽ سڄو ڏينهن جاري رهيو.
ڪيوبا جي صدر بحران جو الزام آمريڪا تي لڳائيندي چيو ته آمريڪي پابندين ۽ تيل سپلائي ڪندڙ ملڪن کي ڌمڪيون ڏيڻ صورتحال کي وڌيڪ سنگين بڻائي ڇڏيو آهي.
هن آمريڪي عملن کي توانائي جي ڀڃڪڙي قرار ڏيندي چيو ته شام جي وقت بجلي جي طلب ۽ پيداوار ۾ 2 هزار ميگا واٽ کان وڌيڪ جو فرق آهي. مجموعي طور 1100 ميگاواٽ بجلي جي پيداوار متاثر ٿي.
ٻئي طرف هونا ۽ ان جي ڀرپاسي وارن علائقن ۾ مسلسل لوڊشيڊنگ خلاف احتجاج ڪيو ويو. مظاهرين روڊن تي نڪري آيا ۽ بجلي بحال ڪرڻ جو مطالبو ڪيو ۽ سخت نعريبازي ڪئي.
ياد رهي ته ڪيوبا جو بجلي جو نظام پراڻن ٿرمل پاور پلانٽس تي ڀاڙي ٿو، جن مان گھڻا 40 سالن کان به پراڻا آهن ۽ بار بار ٽٽندا رهن ٿا.
ملڪ اڳ ئي خوراڪ، دوائن ۽ بنيادي ضرورتن جي کوٽ جو شڪار آهي، جڏهن ته مهانگائي ۽ معاشي بحران عوام جي ڏکيائين ۾ اضافو ڪري ڇڏيو آهي.
هن سال جنوري ۾، آمريڪا ڪيوبا کي ٻارڻ جي پهچائڻ تي سخت پابنديون لاڳو ڪيون، جنهن کان پوء صرف هڪ روسي آئل ٽينڪر ٻيٽ تي پهچي سگهيو.
آمريڪي پرڏيهي وزير ڪيوبا کي 100 ملين ڊالر جي امداد جي آڇ پڻ ڪئي، پر اهو شرط رکيو ته امداد ڪيوبا جي حڪومت بدران ڪيٿولڪ چرچ ذريعي ورهائي وڃي.
ڪيوبا جي پرڏيهي وزير ان آڇ تي محتاط رد عمل ظاهر ڪندي چيو ته حڪومت امداد جي تجويز جا تفصيل ٻڌڻ لاءِ تيار آهي.
واضح رهي ته آمريڪي صدر ڊونلڊ ٽرمپ ڪيترائي ڀيرا چئي چڪو آهي ته ايران ۾ حڪومتي تبديلي کانپوءِ هاڻي ڪيوبا جو بار آهي، جتي آمريڪا مخالف آمريتي حڪومت قائم آهي.
