واشنگٽن:
آمريڪي صدر ڊونلڊ ٽرمپ چيو آهي ته چيني صدر شي جن پنگ مون کي واضح طور تي چيو آهي ته ايران ايٽمي هٿيار حاصل نٿو ڪري سگهي.
ايئر فورس ون ۾ ميڊيا سان ڳالهائيندي هن چيو ته چين 200 بوئنگ جهاز خريد ڪرڻ تي راضي ٿي ويو آهي، ممڪن آهي 750 تائين.
چين اربين ڊالرن جي سويابين خريد ڪرڻ وارو آهي، جنهن سان آمريڪي هارين کي تمام گهڻي خوشي ٿيندي.
هن چيو ته ايران جو ايٽمي پروگرام 20 سالن تائين معطل ڪرڻ تي مون کي ڪو اعتراض ناهي، ايراني تيل خريد ڪندڙ چيني ڪمپنين تي لڳل پابنديون هٽائڻ جو فيصلو ڪندس، ايران جي معاملي تي چيني صدر سان مڪمل اتفاق آهي.
آمريڪي صدر چيو ته چيني صدر شي جن پنگ آبنائي هرمز کي کولڻ چاهي ٿو، آبنائي هرمز کي کولڻ چين جي مفاد ۾ آهي ڇو ته ان جي 40 سيڪڙو واپار ان مان گذرندي آهي. چيني صدر شي جن پنگ مون کي واضح طور تي چيو آهي ته ايران ايٽمي هٿيار حاصل نه ٿو ڪري سگهي.
هن چيو ته تائيوان جي حوالي سان چين کي ڪا به ضمانت نه ڏني وئي آهي، نه ٿو سمجهان ته ان حوالي سان ڪو تڪرار ٿيندو، تائيوان بابت آمريڪي پاليسي ۾ ڪا تبديلي ناهي آئي.
ٽرمپ جو چوڻ هو ته ايران جي باقي بچيل فوجي صلاحيتن بابت نيويارڪ ٽائمز جي رپورٽ ”سنگين خيانت“ آهي ۽ ان خبر ۾ ڪا به سچائي ناهي ته ايران جو 80 سيڪڙو ميزائل سسٽم محفوظ آهي.
هن چيو ته ايران ڪڏهن به ايٽمي هٿيار حاصل نه ٿو ڪري سگهي، اسان ايران جنگ مڪمل طور تي کٽي چڪا آهيون، ايراني فوج، هوائي فوج ۽ قيادت مڪمل طور تباهه ٿي چڪي آهي.
ايران سان ڳالهين جي حوالي سان سوال تي هن چيو ته ايران جي جواب جو پهريون جملو مون کي پسند نه آيو، ان ڪري مون ان کي رد ڪيو. ايران جا پاور پلانٽ صرف ٻن ڏينهن ۾ ختم ڪري سگهون ٿا. ايران جو ايٽمي مواد چين يا آمريڪا ڏانهن منتقل ٿي سگهي ٿو.
برطانوي وزيراعظم ڪيئر اسٽارمر بابت هڪ سوال تي هن چيو ته اسٽارمر پنهنجي توانائي ۽ اميگريشن پاليسي جي ڪري مشڪلاتن کي منهن ڏئي رهيو آهي، هو سٺو ماڻهو آهي.
ان موقعي تي هن هڪ ڀيرو ٻيهر پاڪستان جي قيادت جي واکاڻ ڪندي چيو ته پاڪستان جو وزيراعظم ۽ فيلڊ مارشل عظيم شخصيتون آهن.
