پاڪستان ڪرڪيٽ بورڊ جي چيئرمين محسن نقوي کي آءِ سي سي بورڊ جي اجلاس ۽ آءِ پي ايل فائنل جي ڀارت ۾ باضابطه دعوت ملي وئي آهي.
ڪرڪيٽ ويب سائيٽ موجب انٽرنيشنل ڪرڪيٽ ڪائونسل جا اجلاس هن مهيني ٻن مرحلن ۾ ٿيندا. چيف ايگزيڪيوٽو ڪميٽي جو پهريون اجلاس 21 مئي تي آن لائن ٿيندو، جڏهن ته بورڊ جو اجلاس 30 ۽ 31 مئي تي احمد آباد ڀارت ۾ ٿيندو.
اجلاس ۾ ورلڊ ٽيسٽ چيمپيئن شپ جي فارميٽ ۾ ممڪن تبديلين تي غور ڪيو ويندو، جتي موجوده نظام تحت هر سيريز ۾ گهٽ ۾ گهٽ ٻه ٽيسٽ ميچون کيڏڻ گهرجن. ان کان علاوه زمبابوي، آئرلينڊ ۽ افغانستان کي به ان چيمپيئن شپ ۾ شامل ڪرڻ جي تجويز تي غور ڪيو ويندو.
بورڊ جي اجلاس ۾ چيئرمين محسن نقوي پاڪستان ڪرڪيٽ بورڊ جي نمائندگي ڪندو، پر سندس ڀارت وڃڻ بابت حتمي فيصلو وزيراعظم جي منظوري سان مشروط هوندو.
