جنگبندي جي باوجود اسرائيلي فوج ڏکڻ لبنان جي مختلف علائقن ۾ فضائي ۽ ڊرون حملا جاري رکي ٿي، جڏهن ته تازي حملي ۾ وڌيڪ 10 ڄڻا شهيد ٿي ويا.
لبناني ميڊيا موجب، حملا لبنان ۾ طير ۽ سرحدي ڳوٺن جي ويجهو ڪيا ويا.
لبنان جي صحت واري وزارت جو چوڻ آهي ته حملن ۾ ڪيترائي شهري زخمي ٿيا، جڏهن ته رهائشي عمارتن ۽ انفراسٽرڪچر کي نقصان پهتو. ٻئي طرف اسرائيلي فوج دعويٰ ڪئي آهي ته آپريشن حزب الله جي ٺڪاڻن ۽ فوجي تنصيبات خلاف ڪيو ويو.
حملا هڪ اهڙي وقت ۾ ٿيا آهن جڏهن تازي جنگ بندي معاهدي کانپوءِ خطي ۾ ڇڪتاڻ گهٽ ٿيڻ جي اميد ڪئي پئي وڃي. گڏيل قومن ۽ ڪيترن ئي عالمي ملڪن ٻنهي طرفن تي زور ڏنو آهي ته هو تحمل جو مظاهرو ڪن ۽ جنگ بندي جو احترام ڪن.
تازن مهينن ۾ ڏکڻ لبنان ۾ اسرائيل ۽ حزب الله جي وچ ۾ ويڙهه وڏي پئماني تي جاني نقصان ۽ سرحدي علائقن مان هزارين ماڻهن کي بي گهر ڪيو آهي.
