ايران چيو آهي ته آمريڪا سان جاري ڳالهين ۾ ڪيترن ئي اهم نقطن تي اتفاق ڪيو ويو آهي پر فوري طور تي ڪنهن حتمي معاهدي تي صحيحن جو ڪو به امڪان ناهي.
ايراني پرڏيهي وزارت جي ترجمان اسماعيل بقائي ميڊيا بريفنگ ۾ چيو ته ڳالهين جي اڪثر موضوعن تي اڳڀرائي ٿي آهي پر ان جو مطلب اهو ناهي ته معاهدو فوري طور تي طئي ٿي ويندو.
هن واضح ڪيو ته هن وقت ڳالهين جو بنيادي مقصد جنگ جو خاتمو آهي، جڏهن ته ايٽمي پروگرام جي تفصيلي معاملن تي في الحال ڳالهه ٻولهه نه ٿي رهي آهي.
هن چيو ته ايران پنهنجي قومي مفادن جي تحفظ لاءِ بهترين حڪمت عملي تي ڪم ڪري رهيو آهي ۽ جيڪڏهن ضرورت پئي ته مناسب جواب ڏيندو.
اسماعيل بقائي چيو ته ايران-آمريڪا معاهدي جي حوالي سان ڪا به ضمانت ناهي ته آمريڪا پنهنجون سموريون ذميواريون پوريون ڪندو، پر تهران کي دٻاءُ يا ڌمڪين جي پرواهه ناهي.
هن انڪشاف ڪيو ته گذريل هفتن ۾ ڳالهين ۾ اڳڀرائي پاڪستان ۽ ٻين ملڪن جي ثالثي سان ممڪن ٿي آهي. سندس چوڻ هو ته تجويز ڪيل ڳالهين ۾ لبنان ۾ جاري ڇڪتاڻ ۽ جنگ جي خاتمي بابت هڪ شق پڻ شامل آهي.
آبنائي هرمز جي حوالي سان ايراني ترجمان چيو ته هن اهم سامونڊي لنگهه جو انتظام ساحلي ملڪن جو حق آهي. هن چيو ته ايران ميري ٽائيم ٽول ٽيڪس لاڳو نه ڪندو، پر فراهم ڪيل خدمتن لاءِ ٽيڪس وصول ڪرڻ معمول آهي.
بقائي موجب، ايران خطي ۾ سيڪيورٽي ۽ تجارتي مفادن جي تحفظ کي يقيني بڻائڻ لاءِ آبنائے هرمز جي ڀرسان ملڪن سان مسلسل رابطي ۾ آهي.
هن وڌيڪ چيو ته اسرائيل موجوده ڳالهين کي سبوتاز ڪرڻ جي ڪوشش ڪري سگهي ٿو. سندس چوڻ هو ته اسرائيل معاهدي کي ناڪام بڻائڻ جي هر ممڪن ڪوشش ڪري رهيو آهي ۽ ايران کي خدشو آهي ته اسرائيلي عملن سان ڳالهين تي اثر پئجي سگهي ٿو.
ايراني ترجمان جو اهو به چوڻ هو ته هن وقت پاڪستان جي سرڪاري دوري يا تهران ۾ پاڪستاني عملدارن جي آمد جو ڪو به باضابطه پلان ناهي.
