واشنگٽن: آمريڪا ۾ مختلف سروي ۾ انڪشاف ٿيو آهي ته آمريڪي عوام جو وڏو انگ ايران سان جاري ڇڪتاڻ ۽ جنگي صورتحال جو جلد خاتمو چاهي ٿو ۽ کين ان جنگ مان ڪنهن به مثبت نتيجي جي اميد ناهي.
فاڪس نيوز جي تازي سروي موجب، صرف 39 سيڪڙو آمريڪي ووٽرن ايران جي خلاف فوجي آپريشن جاري رکڻ جي حق ۾ آهن، جڏهن ته اڪثريت جنگ جي خاتمي کي ترجيح ڏني آهي.
اهڙي طرح 52 سيڪڙو آمريڪي شهرين دي نيو يارڪ ٽائمز ۽ سينا ڪاليج جي گڏيل راءِ ۾ ايران جي جنگ ختم ڪرڻ جي حمايت ڪئي. سروي ۾ شامل ماڻهن چيو ته مسلسل ڇڪتاڻ آمريڪا ۽ وچ اوڀر ٻنهي لاءِ وڌيڪ خطرو پيدا ڪري سگهي ٿي.
واشنگٽن پوسٽ ۽ اي بي سي نيوز جي هڪ سروي موجب، 65 سيڪڙو آمريڪن جو خيال آهي ته ايران سان ڪنهن به ممڪن ڊيل کي مڪمل طور تي ايٽمي هٿيارن جي ترقي کان روڪي نه سگهندو.
پيو ريسرچ سينٽر جي هڪ رپورٽ مان معلوم ٿيو آهي ته ٻه ٽيون آمريڪي ايران ۾ آمريڪي مقصدن جي حاصلات تي اعتماد نه ٿا ڪن، جڏهن ته 61 سيڪڙو ماڻهن جو خيال آهي ته جنگ دهشتگردي جو خطرو وڌيو آهي.
سروي موجب 56 سيڪڙو آمريڪين جو چوڻ آهي ته ايران جنگ آمريڪا جا عالمي لاڳاپا متاثر ڪيا آهن جڏهن ته 49 سيڪڙو ماڻهن جو چوڻ آهي ته وچ اوڀر ۾ عدم استحڪام اڃا به وڌي سگهي ٿو.
ان دوران، سي اين اين جي سروي ۾، 59 سيڪڙو آمريڪي شهرين صدر ڊونالڊ ٽرمپ تي گهٽ يا بي اعتمادي جو اظهار ڪيو. سياسي مبصرن موجب عوامي راءِ ۾ اها تبديلي مستقبل جي آمريڪي سياسي منظر نامي تي به اثر انداز ٿي سگهي ٿي.
ماهرن جو چوڻ آهي ته جنگ جي طوالت، وڌندڙ لاڳت ۽ عالمي سطح تي وڌندڙ غير يقيني صورتحال سبب آمريڪي عوام هاڻي سفارتي حل کي وڌيڪ اهميت ڏئي رهيو آهي.
