انڊين پريميئر ليگ (آءِ پي ايل) سمارٽ چشمن جي استعمال تي پابندي لڳائي ڇڏي آهي.
ڀارتي ميڊيا رپورٽن موجب آءِ پي ايل جي اينٽي ڪرپشن اينڊ سيڪيورٽي يونٽ (ACSU) ميچن دوران سڪيورٽي سخت ڪندي سمارٽ شيشيز جي استعمال تي پابندي لڳائي ڇڏي آهي.
نئين هدايتن موجب رانديگرن ۽ سپورٽ اسٽاف کي اسٽيڊيم ۾ داخل ٿيڻ تي سمارٽ چشما سڪيورٽي اهلڪارن کي ڏيڻا پوندا.
رپورٽن مطابق ان جديد شيشيز ۾ لائيو اسٽريمنگ، ميسيج موڪلڻ، ڪال ڪرڻ ۽ وڊيو رڪارڊنگ جهڙا فيچر موجود آهن، جيڪي ميچ دوران غير مجاز رابطن ۽ معلومات جي شيئرنگ جو خطرو وڌائين ٿا.
ACSU واضح ڪيو آهي ته سمارٽ شيشيز موبائل فون، سمارٽ واچز ۽ ٻين اليڪٽرانڪ ڊوائيسز سان گڏ لاڪرز ۾ محفوظ ڪيا ويندا.
جيڪڏهن ڪو رانديگر يا آفيسر هن ڊوائيس سان گڏ پليئر ۽ ميچ آفيسرن جي علائقي ۾ مليو، اهو ضابطن جي خلاف ورزي سمجهي ويندي ۽ ثابت ٿيڻ جي صورت ۾ ڏنڊ سميت ڊسيپلينري ڪارروائي ڪئي ويندي.
تازو ئي راجسٿان رائلز جي ٽيم مئنيجر رومي ڀندر کي ڊگ آئوٽ ۾ موبائل فون استعمال ڪرڻ تي 100,000 روپيا ڏنڊ لڳايو ويو جڏهن ته ڪپتان ريان پراگ کي ڊريسنگ روم ۾ اي سگريٽ استعمال ڪرڻ تي ميچ فيس جو 25 سيڪڙو ۽ ڊيميرٽ پوائنٽ ڏنڊ لڳايو ويو.
