واشنگٽن: آمريڪي نائب صدر جي ڊي وينس ايران سان معاهدي تي عملدرآمد جي حوالي سان اهم ڳالهين ۾ شرڪت لاءِ سوئٽزرلينڊ پهچي ويو آهي، جتي ايران، آمريڪا ۽ غير جانبدار ملڪن جي نمائندن وچ ۾ ڳالهين جو امڪان آهي.
روانگي کان اڳ صحافين سان ڳالهائيندي جي ڊي وينس چيو ته سندس دورو مختصر هوندو ۽ هو هڪ يا ٻه ڏينهن سوئٽزرلينڊ ۾ رهندو. هن اميد ظاهر ڪئي ته ان دوران ايران جي ايٽمي پروگرام ۽ لبنان ۾ جنگ بندي جي حوالي سان اهم اڳڀرائي ٿي سگهي ٿي.
“مون کي اميد آهي ته اسان ايٽمي مسئلي تي پيش رفت ڪنداسين ۽ لبنان ۾ جنگبندي جي مسئلي تي اسان کي مثبت نتيجا ملندا. اهي ٻه وڏا موضوع آهن جن تي اسان ڌيان ڏيڻ جاري رکنداسين،” آمريڪي نائب صدر چيو.
رپورٽن مطابق سوئٽزرلينڊ ۾ ٿيندڙ ڳالهين جو مقصد آمريڪا ۽ ايران وچ ۾ تازو ٿيل مفاهمتي معاهدي تي عملدرآمد کي حتمي شڪل ڏيڻ آهي. پاڪستان ۽ قطر سميت ٻيا وچٿرا ملڪ به ان عمل ۾ اهم ڪردار ادا ڪري رهيا آهن.
سفارتي ذريعن موجب ڳالهين ۾ ايران جي ايٽمي پروگرام، خطي ۾ استحڪام، لبنان جي صورتحال ۽ جنگ بندي جي مستقبل سميت ڪيترن ئي اهم معاملن تي خيالن جي ڏي وٺ جو امڪان آهي.
اها پيش رفت هڪ اهڙي وقت ۾ سامهون آئي آهي جڏهن آمريڪا ۽ ايران وچ ۾ ٿيل تازي معاهدي کي وچ اوڀر ۾ ڇڪتاڻ گهٽائڻ جي طرف اهم قدم قرار ڏنو پيو وڃي. عالمي برادري به انهن ڳالهين کي خطي جي امن ۽ استحڪام لاءِ انتهائي اهم سمجهي رهي آهي.
سياسي مبصرن موجب جي ڊي وينس جي سڌي ريت شرڪت ان ڳالهه جو اشارو آهي ته واشنگٽن انهن ڳالهين کي غير معمولي اهميت ڏئي رهيو آهي ۽ آمريڪا خطي ۾ پائيدار امن لاءِ عملي قدمن جو خواهشمند آهي.
ماهرن جو چوڻ آهي ته جيڪڏهن ڳالهيون ڪامياب ٿيون ته ان جا مثبت اثر نه رڳو ايران ۽ آمريڪا جي لاڳاپن تي پر پوري وچ اوڀر جي سياسي ۽ سيڪيورٽي صورتحال تي به پئجي سگهن ٿا.
