ايران جي ترجمان اسماعيل بقائي چيو آهي ته آمريڪا سان ٿيل معاهدي ۾ ايران جي منجمد اثاثن جي واپسي ۽ آمريڪا ۽ اسرائيل جي فوجي ڪاررواين سبب ٿيل نقصان جو معاوضو شامل آهي.
ورلڊ نيوز ايجنسي جي مطابق ايراني پرڏيهي وزارت جي ترجمان اسماعيل بقائي چيو آهي ته ايران ۽ آمريڪا وچ ۾ مفاهمت جي ياداشت تي صحيحون جمعي تي جنيوا ۾ ٿينديون، ان کان اڳ ايراني وفد خطي جي مختلف ملڪن ۽ پاڙيسري رياستن جو دورو ڪندو.
پريس ڪانفرنس کي خطاب ڪندي اسماعيل بقائي چيو ته 110 ڏينهن واري جنگ ۾ ايراني عوام پنهنجي حڪومت ۽ هٿياربند فوج جو ڀرپور ساٿ ڏنو ۽ بي مثال ثابت قدمي جو مظاهرو ڪيو.
هن ايراني عوام کي خراج تحسين پيش ڪندي چيو ته ايران پنهنجي قيادت، فوجي ڪمانڊرن ۽ عام شهرين جي قربانين کي ڪڏهن به وساري نه سگهندو.
ايراني پرڏيهي وزارت جي ترجمان اسرائيل تي لبنان ۽ فلسطين ۾ جارحيت جاري رکڻ جو الزام هڻندي چيو ته عالمي ادارا صهيوني رياست جي ڪاررواين کي روڪڻ ۾ ناڪام ٿي ويا آهن ۽ ايران خلاف آمريڪي ۽ اسرائيلي حملن جي مذمت ڪن ٿا.
اسماعيل بقائي چيو ته ايران هميشه ڳالهين ۽ سفارتڪاري جي رستي کي ترجيح ڏني آهي پر ڪنهن معاهدي تي پهچڻ جو مطلب اهو ناهي ته ايران جنگ دوران ڪيل نقصانن يا ڏوهن کي وساري ڇڏيندو.
سندس چوڻ هو ته ايران جي منجمد اثاثن جي بحالي ۽ واپسي ۽ جنگي نقصانن جو معاوضو ڳالهين جا اهم حصا آهن ۽ ايران کي اهي مطالبا ڪرڻ جو پورو حق آهي.
اسماعيل بقائي چيو ته آمريڪا سان ٿيل مفاهمت جي ياداشت ۾ لبنان سان لاڳاپيل نقطا به شامل آهن، جڏهن ته لبنان جي خودمختياري ۽ سلامتي جو احترام به يقيني بڻايو ويندو.
هن الزام لڳايو ته جنگبندي باوجود اسرائيل لبنان تي حملا جاري رکي ٿو، جنهن سبب معاهدي تي عملدرآمد جو غور سان جائزو ورتو ويندو.
ايراني ترجمان وڌيڪ چيو ته عمان جي سهڪار سان آبنائے هرمز ۾ سامونڊي لنگهه کي محفوظ بڻائڻ لاءِ قدم کنيا ويندا ۽ ٻين لاڳاپيل ڌرين سان مشاورت پڻ ڪئي ويندي.
هن واضح ڪيو ته ايران هميشه اهو چيو آهي ته آبنائے هرمز مان گذرندڙ جهازن کان ڪو به ٽول وصول نه ڪيو ويندو.
اسماعيل بقائي موجب، مفاهمتي ياداشت تي صحيحن جي طريقيڪار کي اڄ يا سڀاڻي حتمي شڪل ڏني ويندي، جنهن کانپوءِ ان جو باضابطا اعلان ڪيو ويندو.
هن وڌيڪ چيو ته ايراني عوام جو اعتماد بحال ڪرڻ لاءِ آمريڪا کي اڃا ڊگهو رستو طئي ڪرڻو آهي پر ايران هر صورت ۾ معاهدي جي پاسداري ڪندو.
