چين آمريڪا ۽ ايران تي زور ڏنو آهي ته هو جنگ جي خاتمي ۽ مستقل حل طرف وڌڻ لاءِ جاري امن ڳالهين ۾ اختلافن کي جلد حل ڪن.
عالمي خبرون ڏيندڙ اداري موجب چيني پرڏيهي وزارت جي ترجمان مائو ننگ باقاعده پريس بريفنگ ۾ چيو ته وچ اوڀر جي صورتحال تي چين جو موقف واضح آهي. هي هڪ تڪرار آهي جيڪو ڪڏهن به شروع نه ٿيڻ گهرجي.
هن وڌيڪ چيو ته ان تڪرار جو جلد سياسي ۽ سفارتي حل نه رڳو آمريڪا ۽ ايران پر پوري خطي ۽ عالمي برادري جي مفاد ۾ آهي. جنگ کي طول ڏيڻ ڪنهن جي به حق ۾ ناهي.
چيني ترجمان مائو ننگ پارٽين تي زور ڀريو ته هو ڇڪتاڻ جي رفتار کي برقرار رکن، سياسي حل جي رستي تي قائم رهن ۽ ڳالهين ۽ صلاح مشوري ذريعي حل ڳولين، جنهن ۾ سڀني ڌرين جي خدشن کي مدنظر رکي.
چيني ترجمان جنگ بندي معاهدي ۾ پاڪستان جي ثالثي واري ڪردار کي ساراهيندي چيو ته هن ٻين ملڪن کي اپيل ڪئي آهي ته هو ان عمل ۾ پنهنجو تعميري ڪردار ادا ڪن.
اهو بيان هڪ اهڙي وقت سامهون آيو آهي جڏهن آمريڪا ۽ ايران وچ ۾ جنگ بندي ۽ ممڪن امن معاهدي جي حوالي سان سفارتي سرگرميون تيز ٿي چڪيون آهن، جڏهن ته پاڪستان جو ڪردار به اهم ثالث طور سامهون اچي رهيو آهي.
ياد رهي ته ان سموري سفارتي عمل ۾ پاڪستان جو ڪردار خاص طور تي نمايان رهيو آهي. اپريل ۾ آمريڪا ۽ ايران وچ ۾ پهريون عارضي جنگ بندي پاڪستان جي وچ ۾ ٿيو هو، جنهن کانپوءِ اسلام آباد ٻنهي طرفن جي وچ ۾ رابطن ۾ سرگرم ٿي ويو آهي.
چيني صدر شي جن پنگ به تازي ملاقات ۾ وزيراعظم شهباز شريف ۽ فيلڊ مارشل سيد عاصم منير جي ڪوششن کي ساراهيو ۽ چيو ته پاڪستان خطي ۾ امن ۽ استحڪام لاءِ مثبت ڪردار ادا ڪري رهيو آهي.
ان موقعي تي چيني صدر پاڪستان سان گڏ آبنائے هرمز ۾ محفوظ بحري ٽريفڪ ۽ ڳالهين واري عمل لاءِ پنهنجي حمايت جو ورجاءُ پڻ ڪيو.
