تل ابيب:
اسرائيل غزه لاءِ امداد کڻندڙ گلوبل اسٽيبلٽي فلوٽلا جي گرفتار ميمبرن کي يونان موڪلڻ جو فيصلو ڪيو آهي، سفارتي ۽ انساني حقن جي حلقن ۾ خدشا پيدا ڪيا ويا آهن.
عرب ميڊيا رپورٽن موجب اسرائيلي اختيارين شروعاتي طور تي 175 گرفتار ٿيلن کي اسرائيل منتقل ڪرڻ جو اشارو ڏنو هو پر بعد ۾ يوناني حڪومت سان ٺاهه تحت کين سڌو يونان منتقل ڪرڻ جو فيصلو ڪيو ويو.
اسرائيلي پرڏيهي وزير موجب سمورن ماڻهن کي ايندڙ ڪجهه ڪلاڪن ۾ يونان جي ساحل تي لينڊ ڪيو ويندو.
ٻئي طرف پاڪستان جي پرڏيهي وزير اسحاق ڊار عالمي پاڻين ۾ فلوٽلا تي سوار ڪارڪنن جي گرفتاري تي سخت ردعمل ظاهر ڪندي ان کي عالمي قانون جي واضح ڀڃڪڙي قرار ڏنو آهي.
هن چيو ته انسانيت جي امداد ۾ رڪاوٽون وجهڻ هڪ غير ذميواراڻو عمل آهي جنهن تي عالمي برادري کي فوري ڌيان ڏيڻ گهرجي.
اسحاق ڊار مطالبو ڪيو ته فلوٽلا ۾ شامل سمورن رضاڪارن ۽ امدادي ڪارڪنن کي فوري طور تي آزاد ڪيو وڃي ۽ عالمي قانونن جي ڀڃڪڙي ڪندڙ عملن جو نوٽيس ورتو وڃي.
ياد رهي ته هڪ ڏينهن اڳ اسرائيلي نيوي جي اسپيڊ بوٽن فلوٽلا جي جهازن کي سمنڊ ۾ گهيرو ڪيو هو، جنهن جي نتيجي ۾ ڪيترن ئي ماڻهن کي حراست ۾ ورتو ويو هو.
امدادي تنظيمن جو چوڻ آهي ته واقعي کان پوءِ ڪارڪنن سان رابطو به ڪٽجي ويو آهي، جنهن سبب خدشا وڌيڪ وڌي ويا آهن.
