اسڪردو انٽرنيشنل ايئرپورٽ کي سياحن لاءِ جديد گيٽ وي بڻائڻ لاءِ ان جي توسيع تي ڪم شروع ڪيو ويو آهي.
پاڪستان ايئر پورٽ اٿارٽي جي ترجمان موجب منصوبي جو مقصد گلگت بلتستان ۾ سياحت کي فروغ ڏيڻ سان گڏ مسافرن کي جديد ۽ بهتر سفري سهولتون فراهم ڪرڻ آهي. ان سلسلي ۾ تعميراتي ڪم شروعاتي مرحلن ۾ آهي ۽ منصوبي جي لائين مارڪنگ ڪئي پئي وڃي.
پي اي اي جي ترجمان سيف الله خان موجب توسيع واري منصوبي تحت ٽرمينل بلڊنگ جي ايراضي 21 هزار اسڪوائر فوٽ مان وڌائي 39 هزار اسڪوائر فوٽ ڪئي ويندي. ڊپارچر لائونج جي ويهڻ جي گنجائش 300 مان وڌائي 900 ڪئي ويندي، جڏهن ته اريائيل لائونج جي گنجائش 80 مان وڌائي 200 ڪئي ويندي. منصوبي ۾ روانگي ۽ آمد واري لائونج اندر ايگزيڪيوٽو لائونج پڻ شامل آھي.
منصوبي تحت چيڪ اِن ۽ بريفنگ ڪائونٽرن جو تعداد 6 مان وڌائي 10 ڪيو ويندو، جڏهن ته گاڏين جي پارڪنگ جي گنجائش پڻ 200 مان وڌائي 600 ڪئي ويندي، ان کان علاوه ايئرپورٽ جي آپريشنل صلاحيت کي وڌيڪ وڌائڻ لاءِ جديد ڪارگو آفيس بلاڪ پڻ تعمير ڪيو ويندو.
ترجمان موجب اسڪردو انٽرنيشنل ايئرپورٽ جي توسيع واري منصوبي جي مڪمل ٿيڻ سان سياحن ۽ ٻين مسافرن کي جديد ۽ بهتر سفري سهولتون ملنديون، جڏهن ته ان سان گلگت بلتستان ۾ سياحت، اقتصادي سرگرمين ۽ هوائي رابطن جي فروغ ۾ پڻ مدد ملندي.
