خيبرپختونخواهه جي وڏي وزير سهيل آفريدي چيو آهي ته افغانستان سان ڳالهيون ئي اڳتي وڌڻ جو واحد موثر رستو آهي.
يورپي يونين جي سفير ريمنڊاس ڪيروبلس جي اڳواڻي ۾ آيل وفد سان ڳالهائيندي سهيل آفريدي چيو ته پاڪستان ۽ افغانستان جي وچ ۾ هزارين سالن جي گڏيل تاريخ ۽ ثقافتي لاڳاپا آهن.
هن چيو ته عمران خان ملڪ جو سڀ کان وڏو سياسي ليڊر آهي جنهن جو موقف واضح آهي ته جنگ ۽ فوجي آپريشن مسئلن جو حل ناهي. موجوده صورتحال سبب خيبرپختونخواهه جو افغانستان سان 10 ارب رپين کان وڌيڪ جو سالياني واپار سخت متاثر ٿيو آهي.
سهيل آفريدي چيو ته صوبائي حڪومت نصاب ۽ نصاب ۾ مارڪيٽ جي تقاضا موجب سڌارا آڻي رهي آهي، عمران خان جي ويزن موجب نوجوانن تي سيڙپڪاري ڪئي پئي وڃي.
وڏي وزير وڌيڪ چيو ته صوبي ۾ تعليمي بجيٽ ۾ ڪيترائي ڀيرا اضافو ڪيو ويو آهي ۽ تعليم جي بهتري تي خاص ڌيان ڏنو پيو وڃي. ايجوڪيشن ڪارڊ متعارف ڪرايو ويو آهي ته جيئن يتيم ۽ نياڻين کي انٽرميڊيٽ سطح تائين مفت تعليم ڏني وڃي.
ان موقعي تي يورپي يونين جي سفير ريمونڊاس ڪيروبلس چيو ته ٽيڪنالاجي ۽ ووڪيشنل اسڪلز ترجيحي شعبا آهن، سينٽر آف ايڪسيلنس مستقبل جي ضرورتن مطابق جديد ماڊل آهي.
ملاقات ۾ ٻطرفن لاڳاپن تي تفصيلي خيالن جي ڏي وٺ ڪئي وئي. وڏي وزير يورپي وفد جي آجيان ڪئي ۽ سينٽر آف ايڪسيلنس قائم ڪرڻ ۾ يورپي يونين جي سهڪار کي ساراهيو. ان موقعي تي اعليٰ تعليم واري مملڪتي وزير مينا خان آفريدي، ايڊيشنل چيف سيڪريٽري پلاننگ اينڊ ڊولپمينٽ ۽ يورپي يونين جا عملدار پڻ موجود هئا.
