ڪراچي:
شهر قائد جي علائقي گلستان جوهر ۾ ٻن گروپن ۾ انڌاڌنڌ فائرنگ جي نتيجي ۾ هڪ نوجوان مارجي ويو ۽ عورت سميت 2 ڄڻا زخمي ٿي پيا.
تفصيل موجب گلستان جوهر جي علائقي بلاڪ 9 پهلوان ڳوٺ روٽ نمبر بي-3 بس اسٽاپ ڀرسان نالي ڀرسان فائرنگ جي نتيجي ۾ هڪ نوجوان مارجي ويو ۽ عورت سميت 2 ڄڻا زخمي ٿي پيا.
فوتين ۽ زخمين کي الخدمت ايمبولينس ذريعي جناح اسپتال منتقل ڪيو ويو.
ڪراچي پوليس جي ترجمان موجب مارجي ويل نوجوان جي سڃاڻپ 18 ورهين جي شاهزيب ولد سعيد خان جي نالي سان ٿي آهي، زخمين ۾ 18 ورهين جو نور صادق ولد دين محمد ۽ 60 ورهين جي حضرت بي بي زال قمر گل شامل آهن.
واقعي جو اطلاع ملندي ئي پوليس ۽ رينجرز جي وڏي نفري واقعي واري هنڌ پهچي وئي، پوليس فرانزڪ ٽيم کي طلب ڪري شاهديون گڏ ڪيون.
فوتي جي چاچي ۽ ٻين ڳوٺاڻن جو چوڻ هو ته مقتول شاهزيب 2 ڀينرن ۽ 4 ڀائرن ۾ وڏو هو، ڪجهه عرصو اڳ هو هڪ خانگي ڪوريئر ڪمپني ۾ رائيٽر طور ڪم ڪندو هو پر بيماري سبب هن نوڪري ڇڏي ڏني.
زخمي نور صادق فوتي جو ڀيڻويو آهي جڏهن ته زخمي عورت مقتول جي پاڙيسري آهي.
نور محمد جو چوڻ هو ته واقعي وقت ڀرسان بازار ۾ سندس مخالف گروپ سان جهيڙو ٿي پيو، جنهن تي سندس ٻين ساٿين ۽ مخالف گروپ وچ ۾ انڌاڌنڌ فائرنگ شروع ٿي وئي.
هو فائرنگ جي اطلاع ڏيڻ لاءِ گهر پهتو ته ڏٺو ته شاهزيب، نور صادق ۽ پاڙي جا ٻيا نوجوان قرباني جي جانور (ڳئون) وٽ ويٺا هئا.
هو اڃا اتي پهتو هو ته مخالف گروپ جي شان عرف شانو ۽ حيدر سميت 7 کان 8 هٿياربند اتي پهچي ويا ۽ انڌاڌنڌ فائرنگ ڪري ڏني، جنهن جي نتيجي ۾ شاهزيب موقعي تي ئي مارجي ويو ۽ ٻيا زخمي ٿي پيا.
هن چيو ته جڏهن هو فوتين ۽ زخمين کي ايمبولينس ۾ آڻي رهيا هئا ته جوابدارن ايمبولينس تي مشين گن جي برسٽ فائر پڻ ڪئي، جنهن سبب گوليون ايمبولينس ۾ لڳيون، پر ان ۾ موجود ماڻهو محفوظ رهيا.
هن چيو ته فائرنگ ڪندڙ سمورا ڇوڪرا علائقي جا آهن ۽ هو انهن سڀني کي منهن تان سڃاڻي ٿو.
پوليس زخمين جا بيان رڪارڊ ڪري ورتا، جڏهن ته مقتول جي چاچي نور محمد جو بيان رڪارڊ ڪيو ويو.
پوليس جو چوڻ آهي ته واقعو خانداني دشمني جو نشانو آهي. فوتي جو لاش دفنائڻ بعد ڪيس داخل ڪيو ويو آهي، پوليس واقعي جي جاچ ڪري رهي آهي.
