والاريل ويسٽ بئنڪ ۾ اسرائيلي آبادگارن پاران هڪ فلسطيني خاندان کي پنهنجي پيءُ جي قبر ٻيهر کوٽڻ ۽ لاش ٻي جاءِ منتقل ڪرڻ جي واقعي تي عالمي سطح تي سخت ڪاوڙ جو اظهار ڪيو ويو آهي، جڏهن ته گڏيل قومن ان عمل کي غير انساني ۽ شرمناڪ قرار ڏنو آهي.
پرڏيهي ميڊيا رپورٽن موجب 80 ورهين جي فلسطيني شهري حسين عسا کي جمعي جي ڏينهن طبعي موت کانپوءِ جنين ڀرسان اسا ڳوٺ جي قبرستان ۾ دفن ڪيو ويو. خاندان جو چوڻ آهي ته تدفين کان اڳ اسرائيلي اختيارين کان سمورا ضروري اجازت نامو حاصل ڪيو ويو ۽ تدفين قانوني طريقي سان ڪئي وئي.
مقتول جي پٽ محمد عصا موجب دفنائڻ کان ڪجهه دير بعد اسرائيلي آبادگار اتي پهتا ۽ دعويٰ ڪئي ته اها زمين اسرائيلي آباديءَ جو حصو هئي ان ڪري اتي دفنائڻ جي اجازت نه ٿي ڏئي سگهجي. خاندان جو چوڻ هو ته اهو سندن ڳوٺ جو قديم قبرستان آهي ۽ ان جو اسرائيلي آباديءَ سان ڪو به تعلق نه هو.
رپورٽن مطابق آبادگارن ڌمڪيون ڏنيون آهن ته جيڪڏهن خاندان پاڻ قبر نه کوٽي ته بلڊوزر ذريعي قبر کي ڊاهي پٽ ڪري ڇڏينداسين. فلسطيني خاندان جو چوڻ آهي ته واقعي واري جاءِ تي اسرائيلي فوجي به موجود هئا ۽ هنن گهر ڀاتين تي دٻاءُ وڌو ته هو لاش کي ٻئي هنڌ منتقل ڪن.
محمد عاصي ٻڌايو ته هو جڏهن ٻيهر قبرستان پهتو ته آبادگار اڳ ۾ ئي قبر کوٽي ۽ لاش کڻي پهتا، جنهن بعد وارثن زبردستي لاش ڪڍي ٻئي قبرستان ۾ دفن ڪيو.
ٻئي طرف اسرائيلي فوج دعويٰ ڪئي آهي ته هن خاندان کي دفن ڪرڻ جو حڪم نه ڏنو هو پر فوجي اهلڪار رڳو ويڙهه کي روڪڻ لاءِ موجود هئا. فوج موجب آبادگارن وٽان کوٽائي جا اوزار به هٿ ڪيا ويا آهن.
گڏيل قومن جي انساني حقن واري اداري ان واقعي جي سخت مذمت ڪندي چيو آهي ته اهو فلسطينين سان وڌندڙ بي رحمي جو واضح مثال آهي.
گڏيل قومن جي نمائندي اجيت سنگهه چيو آهي ته هي انتهائي افسوسناڪ واقعو آهي، جنهن مان ظاهر ٿئي ٿو ته فلسطينين سان امتيازي سلوڪ جاري آهي، مئل ۽ جيئرو ٻنهي ۾.
واضح رهي ته غزه جنگ شروع ٿيڻ کانپوءِ والاريل اولهه ڪناري ۾ اسرائيلي آبادگارن تي حملن ۽ تشدد ۾ نمايان اضافو ڏسڻ ۾ آيو آهي، جڏهن ته انساني حقن جون تنظيمون اسرائيل تي غير قانوني آبادين جي توسيع ۽ فلسطينين خلاف آپريشن تي تنقيد ڪنديون رهيون آهن.
