تهران: ايران جي تيل واري وزير محسن پاڪ نجاد چيو آهي ته ملڪ جي تيل جي برآمد معمول موجب جاري رهندي ۽ آمريڪا طرفان ايراني تيل جي وڪري تي ٻيهر پابنديون لاڳو ڪرڻ باوجود ڪا به رڪاوٽ نه ايندي.
ايران جي تيل واري وزير پنهنجي بيان ۾ چيو ته ايران ڊگهي عرصي کان آمريڪي پابندين جي اثرن کي منهن ڏيڻ لاءِ موثر نظام ۽ متبادل ڍانچي قائم ڪري چڪو آهي، جنهن جي ڪري هو تيل جي برآمد جاري رکڻ جي صلاحيت رکي ٿو.
هن چيو ته آمريڪا طرفان ڏنل 60 ڏينهن جي رعايتي مدي دوران به اهي متبادل انتظام ختم نه ڪيا ويا پر انهن کي برقرار رکيو ويو ته جيئن ٻيهر پابنديون لاڳو ٿيڻ جي صورت ۾ برآمدات متاثر نه ٿين.
محسن پاڪ نجاد موجب ايران توانائي جي شعبي ۾ پنهنجون سرگرميون جاري رکندو ۽ عالمي مارڪيٽ ۾ خام تيل جي معمول جي فراهمي کي برقرار رکڻ جي ڪوشش ڪندو.
اهو بيان هڪ اهڙي وقت ۾ سامهون آيو آهي جڏهن آمريڪا ايراني تيل جي وڪرو تي سخت پابنديون لاڳو ڪرڻ جو اعلان ڪيو آهي، جڏهن ته خطي ۾ ڇڪتاڻ، آبنائي هرمز جي صورتحال ۽ عالمي توانائي مارڪيٽن تي به سخت نظر رکي پئي وڃي.
اقتصادي ماهرن موجب ايران پاران تيل جي برآمدات جاري رکڻ جو اعلان عالمي توانائي مارڪيٽ لاءِ اهم پيش رفت آهي، جڏهن ته آمريڪي پابندين ۽ علائقائي ڇڪتاڻ سبب مستقبل جي صورتحال جو دارومدار سفارتي ۽ جيو پوليٽيڪل حالتن تي هوندو.
