انقره: آمريڪي صدر ڊونلڊ ٽرمپ ايران، نيٽو ۽ آمريڪي پرڏيهي پاليسي بابت ڪيترائي اهم بيان ڏيندي چيو آهي ته آمريڪا جو تازو فوجي اقدام ايران جي حملن جو جواب آهي، جڏهن ته ايران کي ڪنهن به صورت ۾ ايٽمي هٿيار حاصل ڪرڻ نه ڏنو ويندو.
هن چيو ته سندس خيال آهي ته ايران سان مفاهمت جي ياداشت ختم ٿي چڪي آهي، ايرانين ڳالهين ۾ گهڻو وقت ضايع ڪيو ۽ هو ايران سان ڊيل نٿا چاهين.
نيٽو سربراهه اجلاس جي موقعي تي صحافين سان ڳالهائيندي صدر ٽرمپ چيو ته آمريڪا گذريل رات ايران ۾ فوجي ڪارروائي ڪئي ڇاڪاڻ ته ايراني حملن جو جواب ڏيڻ ضروري هو. سندس چوڻ هو ته آمريڪا پنهنجي مفادن ۽ اتحادين جي دفاع لاءِ هر ممڪن قدم کڻندو.
ٽرمپ دعويٰ ڪئي ته ايران جي فوجي قيادت کي هٽايو ويو آهي ۽ نئين قيادت سامهون آئي آهي. بهرحال، هن ان دعوي جي حق ۾ ڪو به ثبوت پيش نه ڪيو، جڏهن ته آزاد ذريعن طرفان ان جي تصديق نه ڪئي وئي آهي.
آمريڪي صدر چيو ته ايران سان ڳالهين ۾ گهڻو وقت ضايع ڪيو ويو ۽ هاڻي ايران جي ايٽمي پروگرام جي حوالي سان واشنگٽن جو موقف واضح آهي. هن هڪ ڀيرو ٻيهر ان ڳالهه تي زور ڏنو ته ايران ڪنهن به حالت ۾ ايٽمي هٿيار حاصل نٿو ڪري سگهي.
نيٽو بابت ڳالهائيندي ٽرمپ چيو ته هو اتحاد جي موجوده ڪارڪردگيءَ مان مڪمل طور تي مطمئن ناهي. سندس چوڻ هو ته ايران جي معاملي ۾ نيٽو آمريڪا جي اهڙي مدد نه ڪئي جيتري اميد هئي.
هن اهو به چيو ته آمريڪا نيٽو کي سڀ کان وڌيڪ مالي مدد فراهم ڪري ٿو، تنهن ڪري اتحادي ملڪن کي پنهنجون ذميواريون وڌيڪ موثر انداز ۾ ادا ڪرڻ گهرجن.
صدر ٽرمپ دعويٰ ڪئي ته آمريڪا کي نيٽو جي ايتري ضرورت ناهي جيتري نيٽو کي آمريڪا جي ضرورت آهي پر هن اهو به چيو ته هن نيٽو جي سيڪريٽري جنرل سان تعميري ملاقات ڪئي، جنهن ۾ مختلف عالمي ۽ علائقائي معاملن تي خيالن جي ڏي وٺ ڪئي وئي.
اسپين بابت هڪ سوال جي جواب ۾ ٽرمپ چيو ته هو اسپين سان لاڳاپن ۾ دلچسپي نه ٿو رکي پر ان بيان جي تفصيل نه ڏني.
ايران تي تنقيد ڪندي آمريڪي صدر چيو ته گذريل 47 سالن کان ايران دنيا جي مختلف ملڪن لاءِ مسئلا پيدا ڪري رهيو آهي. هن ايراني قيادت بابت به سخت زبان استعمال ڪئي.
سياسي مبصرن موجب صدر ٽرمپ جي تازي بيانن مان ظاهر آهي ته آمريڪا ايران خلاف پنهنجي سخت پاليسي برقرار رکڻ جو ارادو رکي ٿو، جڏهن ته ايران سان ڊيل جي حڪمت عملي تي نيٽو اندر اختلاف موجود آهن.
