ايراني صدر ۽ وزيراعظم وچ ۾ ٽيليفون تي ڳالهه ٻولهه ٿي، جنهن ۾ ٻنهي اڳواڻن عيد الاضحيٰ جي مبارڪباد ڏني، جڏهن ته وزيراعظم اميد ظاهر ڪئي ته امن معاهدو جلد طئي ٿي ويندو ۽ اهو ايراني قوم جي وقار ۽ عزت نفس جي مطابق هوندو.
تفصيل موجب وزيراعظم محمد شهباز شريف عيد الاضحيٰ جي موقعي تي اسلامي جمهوريه ايران جي صدر ڊاڪٽر مسعود المبازڪيان سان ٽيليفونڪ رابطو ڪيو ۽ ٻنهي اڳواڻن وچ ۾ 30 منٽن تائين گرمجوشي ۽ دوستانه ڳالهه ٻولهه ڪئي.
ٻنهي اڳواڻن هڪ ٻئي، پنهنجي پنهنجي ملڪن جي عوام ۽ پوري امت مسلمه کي عيد الاضحيٰ جي مبارڪباد ڏني ۽ نيڪ خواهشن جو اظهار ڪيو.
ايراني صدر خطي ۾ امن قائم ڪرڻ جي ڪوششن ۾ پاڪستان جي اهم ڪردار تي وزيراعظم ۽ فيلڊ مارشل سيد عاصم منير جا ٿورا مڃيا. هن ان ڳالهه کي به ساراهيو ته ان امن ڪوششن ۾ سعودي عرب، قطر ۽ ترڪي سميت ٻيا علائقائي ملڪ به حصو وٺي رهيا آهن.
وزيراعظم هڪ ڀيرو ٻيهر موجوده بحران دوران قيمتي ايراني جانين جي نقصان تي ايراني قيادت ۽ عوام سان مڪمل يڪجهتي جو اظهار ڪيو. ايراني صدر جو وزيراعظم ۽ سندس ٽيم جي نيڪ خواهشن تي شڪريو ادا ڪندي هن چيو ته فيلڊ مارشل سيد عاصم منير خطي ۾ امن جي قيام لاءِ اڻٿڪ ڪوششون ڪيون آهن.
وزيراعظم اميد ظاهر ڪئي ته امن معاهدو جلد طئي ٿي ويندو ۽ اهو ايراني قوم جي وقار ۽ عزت نفس جي مطابق هوندو. هن چيو ته خطي ۾ امن جي قيام سان ايران جي حقيقي اقتصادي صلاحيت کي استعمال ۾ آندو ويندو، جنهن جو فائدو پوري خطي کي پهچندو.
وزيراعظم چيو ته پاڪستان هميشه هڪ ڀاءُ ۽ پاڙيسري جي حيثيت سان ايران سان گڏ بيٺل رهندو ۽ خطي ۾ امن جي بحالي کانپوءِ ٻنهي ملڪن جو روشن ۽ خوشحال مستقبل آهي. ٻنهي اڳواڻن گڏيل رابطن ۽ ويجهن صلاح مشورن کي جاري رکڻ تي اتفاق ڪيو.
