ڪراچي:
ايف آءِ اي جي شهر قائد ۾ غير قانوني ذخيرن تي وڏي ڪارروائي دوران هزارين ليٽر پيٽرول هٿ ڪيو ويو.
ايف آءِ اي اينٽي ڪرپشن سرڪل ڪراچي جي ڪورنگي انڊسٽريل ايريا جي مهراڻ ٽائون ۾ قائم غير قانوني آئل اسٽوريج تي ڇاپو هڻي تيل جي غير قانوني ذخيرو ۽ پيٽرول چوري ۾ ملوث عنصرن خلاف وڏي ڪارروائي ڪئي.
ايف آءِ اي ترجمان موجب اها ڪارروائي انڪوائري نمبر 61/2026 جي بنياد تي ڪئي وئي. ان دوران 50 هزار ليٽر جي گنجائش جو هڪ ٽينڪر لاري هٿ ڪيو ويو جنهن ۾ 49 هزار 838 ليٽر پيٽرول (RON-92) هو. ٽينڪر پيٽرول جي چوري ۽ غيرقانوني منتقلي ۾ ملوث ثابت ٿيو، جتان پيٽرول عارضي ڊرمن ۾ ۽ ننڍين گاڏين ذريعي مختلف پيٽرول پمپن تي منتقل ڪيو پيو وڃي.
ڊرائيور جي نشاندهي تي ايف آءِ اي مغل فلنگ اسٽيشن (لڪي پيٽروليم) تي به ڇاپو هڻي وڌيڪ ڪارروائي ڪئي. جاچ دوران معلوم ٿيو ته مغل فلنگ اسٽيشن جو پيٽروليم لائسنس جعلي مليو، بارودي مواد کاتي کان تصديق ڪئي وئي، جنهن بعد نيٽ ورڪ خلاف قانوني ڪارروائي تيز ڪئي وئي.
ايف آءِ اي ترجمان موجب واقعي ۾ ملوث ڪيترن ئي جوابدارن خلاف پاڪستان پينل ڪوڊ جي قلم 409، 406، 420، 468، 471 ۽ 109 تحت ڪيس داخل ڪيو ويو آهي. نامزد جوابدارن ۾ محمد طارق، رياض خان، عبدالحميد، لياقت علي، دلنواز، عمر حيات، احمد خان، رفيق، رضا خان ۽ فهيم خان شامل آهن.
ايف آءِ اي جو چوڻ آهي ته ڪيس ۾ وڌيڪ جاچ ڪئي پئي وڃي. قومي وسيلن کي نقصان پهچائڻ وارن خلاف بنا فرق جي ڪارروائي ڪئي ويندي.
ترجمان واضح ڪيو ته تيل جي غير قانوني ذخيرو، پيٽرول چوري ۽ جعلي لائسنس ذريعي قومي خزاني کي نقصان پهچائڻ وارن خلاف ڪريڪ ڊائون ڪيو ويندو.
