اسلام آباد:
پنج مهينا اڳ جڏهن محمود خان اچڪزئي کي اپوزيشن ليڊر بڻايو ويو هو ته اميد هئي ته هو پي ٽي آءِ کي ٽڪراءَ جي سياست مان ڪڍي ڳالهين جي طرف وٺي ويندو، پر ڪالهه هو پاڻ به ان ئي رستي تي هلندي نظر آيو.
شريف خاندان سان سندس پراڻا لاڳاپا ان اميد جو بنيادي سبب هئا، پر هاڻوڪي پارلياماني ڪارروائي، جنهن ۾ ڪالهه قومي اسيمبليءَ جو اجلاس به شامل آهي، ڳالهين بدران مسلسل ڇڪتاڻ جي عڪاسي ڪري ٿو.
ڪالهه اڱاري ڏينهن قومي اسيمبلي ۾ پنهنجي تقرير دوران اچڪزئي موجوده حڪومت کي ”ناجائز“ قرار ڏيندي ان تي جمهوري ادارن کي ڪمزور ڪرڻ جو الزام هنيو. هن وزيراعظم کان سوال ڪيو ته اپوزيشن ڪهڙو ڏوهه ڪيو آهي جو کين احتجاج ۽ ريليون ڪڍڻ جي حق کان به محروم ڪيو پيو وڃي.
وزيراعظم دعويٰ کي رد ڪري ڇڏيو ۽ حڪومت جي آئيني حيثيت جو دفاع ڪيو. تلخ ڇڪتاڻ تڏهن وڌي جڏهن اسپيڪر مداخلت ڪئي ۽ اچڪزئي کي خبردار ڪيو ته ايوان ۾ قومي ادارن تي تنقيد نه ڪئي وڃي.
مخالف ڌر اسپيڪر جي بيان جي مذمت ڪندي ان کي پارليامينٽ ۾ اختلافن کي دٻائڻ جي ڪوشش قرار ڏنو. اچڪزئي کي حڪومت سان ڳالهين لاءِ آندو ويو، انهن ڳالهين ذريعي سڀ کان اهم ۽ تڪڙو مسئلو اکين جو علاج ۽ پي ٽي آءِ جي باني جي ذاتي ڊاڪٽرن تائين پهچ جو هو، پر احتجاج ۽ ڌرڻا اهو مطالبو پورا نه ڪري سگهيا، پي ٽي آءِ اندر وڌندڙ مايوسي هاڻي لڪل نه رهي.
علي محمد خان چيو ته وزيراعظم محمود اچڪزئي کي ٻه ڀيرا ڳالهين جي دعوت ڏئي چڪو آهي، هاڻي کيس جرئتمنداڻي فيصلو ڪرڻ گهرجي ۽ جنهن مقصد لاءِ کيس مقرر ڪيو ويو آهي، ان کي پورو ڪرڻ گهرجي.
دٻاءُ رڳو لفظن تائين محدود ناهي، پي ٽي آءِ جي سينيئر اڳواڻ شاهد خٽڪ جو چوڻ آهي ته جيڪڏهن نتيجا نه آيا ته پارٽي اچڪزئي ۽ علامه ناصر عباس ٻنهي جا عهدا ۽ اختيار کسي سگهي ٿي.
ٻئي طرف سينيٽر پرويز رشيد چيو آهي ته محمود خان اچڪزئي هڪ عقلمند ۽ جمهوري اڳواڻ آهي جيڪو پيچيده سياسي مسئلن کي حل ڪرڻ ڄاڻي ٿو.
بهرحال اصل مسئلو پاڻ اچڪزئي سان نه پر انهن سان آهي، جن کيس اپوزيشن ليڊر مقرر ڪيو آهي، ڇاڪاڻ ته هو کيس اهي اختيار نه ڏئي رهيا آهن، جن جي توقع هئي.
پي ٽي آءِ اڳواڻن کي رليف عدالتي عمل ذريعي نه پر دٻاءُ ذريعي ملندو. رياست طاقت سان واپسي جي اجازت نه ڏيندي، پر آئين جي مطابق پنهنجي رٽ قائم ڪندي.
