اسلام آباد:
قومي ڪرڪيٽ ٽيم جي اڳوڻي مشهور فاسٽ بالر شعيب اختر جو وڏو ڀاءُ شاهد اختر لاڏاڻو ڪري ويو، جنهن سبب ڪرڪيٽ حلقن ۽ مداحن ۾ ڏک جي لهر ڇانيل آهي.
سوشل ميڊيا تي پنهنجي پيغام ۾ شعيب اختر پنهنجي ڀاءُ جي لاڏاڻي تي گهري ڏک ۽ افسوس جو اظهار ڪندي سندس مداحن سميت عوام کي دعا جي اپيل ڪئي آهي ته هو مرحوم جي لاءِ دعا ڪن.
پنهنجي جذباتي پيغام ۾ شعيب اختر چيو ته انتهائي افسوس سان ٻڌايان ٿو ته منهنجو پيارو ڀاءُ شاهد اختر الله تعاليٰ جي رضا ۾ واپس اچي ويو آهي.
منهنجي سڀني دوستن کي گذارش آهي ته هو پنهنجي دعائن ۾ ياد رکن ۽ الله تعاليٰ کان سندن مغفرت ۽ بخشش جي دعا ڪن.
خانداني ذريعن موجب مرحوم شاهد اختر جي جنازي نماز اڄ اربع 24 جون 2026 تي اسلام آباد جي ايڇ 8 قبرستان ۾ عصر جي نماز بعد ادا ڪئي ويندي، جنهن ۾ گهرڀاتين، مائٽن، دوستن ۽ مختلف شعبن سان تعلق رکندڙ شخصيتن جي شرڪت جو امڪان آهي.
