اسلام آباد: وزيراعظم جي ٽاسڪ فورس آن ميري ٽائيم ريفارمز تحت پاڪستان جي بندرگاهن ۾ بهتري اچڻ شروع ٿي وئي آهي جنهن جي نتيجي ۾ آپريشنز ۾ نمايان بهتري اچي رهي آهي.
آفيسرن موجب ٽاسڪ فورس ۾ شامل مختلف ادارن پاران کنيل قدمن سبب پورٽ سسٽم کي وڌيڪ موثر بڻايو پيو وڃي، جنهن ۾ (اين ايل سي) به شامل آهي.
سڌارن جي قدمن تحت بندرگاهن کي جديد خطوط تي ترقي ڏيڻ، آپريشنل ڪارڪردگي وڌائڻ ۽ پاڪستان کي ٽرانسپورٽ جو مرڪز بڻائڻ جي حڪمت عملي تي عمل جاري آهي.
ان کان علاوه، پاڪستان سنگل ونڊو لاڳو ڪرڻ ۽ لاڳاپيل ادارن جي انضمام سان ڪسٽم ڪليئرنس سسٽم کي بهتر بڻايو ويو آهي.
اهڙي طرح WeBOC سسٽم جي اپ گريڊيشن ۽ پورٽ ڪميونٽي سسٽم کي لاڳو ڪرڻ سان ڪليئرنس جي عمل ۾ خاصي تيزي آئي آهي، جڏهن ته جهاز جي آمد کان اڳ سامان جي ڊيڪليئريشن جمع ڪرائڻ جو نئون نظام پڻ متعارف ڪرايو ويو آهي.
آفيسرن جو چوڻ آهي ته قومي بندرگاهن کي هموار ڪرڻ، يونيفارم ٽيرف لاڳو ڪرڻ ۽ مختلف ڪارگوز لاءِ وقف بندرگاهن تي به اڳڀرائي ٿي رهي آهي.
ان کان علاوه ريلوي نيٽ ورڪ، ٽريڪ اينڊ ٽريس ۽ بانڊڊ ٽرانسپورٽ سسٽم کي مضبوط ڪرڻ لاءِ قدم کنيا پيا وڃن، جڏهن ته ڊجيٽلائيزيشن، آٽوميشن ۽ اسپيس مئنيجمينٽ ذريعي بندرگاهن تي رش ۾ نمايان گهٽتائي آئي آهي.
آفيسرن موجب ٽرانس شپمينٽ جي ضابطن تي عملدرآمد ۽ سيڙپڪار دوست پاليسين سان سيڙپڪاري جا موقعا وڌي رهيا آهن، ٽاسڪ فورس جي سفارشن تي عملدرآمد پاڪستان کي علائقائي ٽرانسپورٽ جو مرڪز بڻائڻ جي طرف اهم قدم ثابت ٿي رهيو آهي.
