برلن جا رستا طالبان راڄ خلاف نعرن سان گونجي ويا، جتي افغان برادري سخت احتجاج ڪيو.
بندوق جي زور تي مسلط ٿيل طالبان جي حڪومت خلاف اندروني مزاحمتي تحريڪن سان گڏوگڏ ٻاهرين ملڪن ۾ به عوامي مزاحمت تيز ٿي وئي آهي.
افغان ميڊيا رپورٽن موجب جرمني جي راڄڌاني برلن ۾ سوين افغان شهري طالبان حڪومت جي ظالماڻي پاليسين خلاف روڊن تي نڪري آيا. احتجاج ۾ عورتن سميت مختلف مذهبي گروهن سان تعلق رکندڙ افغان شهرين شرڪت ڪئي ۽ ”مرگ بر طالبان“ جا زوردار نعرا هنيا.
رپورٽ موجب افغان مظاهرين طالبان حڪومت پاران عورتن جي تعليم ۽ روزگار تي پابندين خلاف سخت احتجاج ڪيو ۽ صورتحال تي عالمي مداخلت جو مطالبو پڻ ڪيو. مظاهرين چيو ته طالبان حڪومت جي ناقص معاشي پاليسين سبب افغانستان ۾ غربت ۽ بيروزگاري انتها تي پهچي چڪي آهي.
افغان مظاهرين مطالبو ڪيو ته عالمي برادري ۽ يورپي ملڪ طالبان حڪومت سان نرمي واري پاليسي ختم ڪري فوري طور تي دٻاءُ وڌائين.
ٻئي طرف عالمي ماهرن جو چوڻ آهي ته طالبان جي حڪومت خلاف ملڪ اندر ۽ ٻاهرين ملڪن ۾ اڀرندڙ مزاحمتي تحريڪون افغان طالبان جي عوامي حمايت ۽ مڪمل ڪنٽرول جي دعوائن جي قلعي کي کولي رهيون آهن. انساني حقن جون سنگين ڀڃڪڙيون، خراب ٿيندڙ معيشت ۽ عالمي سفارتي اڪيلائي جون نشانيون آهن ته هي حڪومت ماضيءَ جي شيءِ ٿيڻ جي ڪناري تي آهي.
