تهران: آمريڪا سان تازي جنگ کانپوءِ ايراني پارليامينٽ جو پهريون باقاعده اجلاس ٿيو، جنهن ۾ ڪيترن ئي ميمبرن آمريڪا سان مفاهمت جي يادداشت کي ختم ڪرڻ ۽ سيد علي خامنه اي جي شهادت جو بدلو وٺڻ جو مطالبو ڪيو.
ايران جي سرڪاري ميڊيا موجب 290 رڪني پارليامينٽ جي 180 ميمبرن گڏيل بيان جاري ڪندي چيو ته آمريڪا سان مفاهمت جي موجوده ياداشت کي ختم ڪري نئين حڪمت عملي اختيار ڪئي وڃي. ميمبرن جو خيال هو ته هاڻوڪي واقعن کانپوءِ ايران کي پنهنجي پاليسين تي نظرثاني ڪرڻ گهرجي.
اجلاس تقريبن چئن مهينن کانپوءِ ٿيو، جنهن ۾ پارلياماني قاعدن ۽ ضابطن ۾ اهم ترميمن جي منظوري پڻ ڏني وئي. نئين ترميمن تحت، پارليامينٽ جا مجازي سيشن مستقبل ۾ هنگامي حالتن يا غير معمولي حالتن دوران منعقد ڪري سگهندا.
اجلاس دوران آبنائے هرمز جي اسٽريٽجڪ مئنيجمينٽ بابت هڪ نئون بل به پيش ڪيو ويو، جنهن جو مقصد هن اهم عالمي شپنگ لين سان لاڳاپيل انتظام ۽ سيڪيورٽي معاملن کي وڌيڪ موثر بڻائڻ آهي.
پارليامينٽ جي ڪيترن ئي ميمبرن ڳاڙهي جهنڊا پڻ بلند ڪيا، جيڪي ايران ۾ انتقام ۽ مزاحمت جي علامت سمجهيا وڃن ٿا، انهن ۾ سيد علي خامنه اي جي شهادت جو بدلو وٺڻ جو مطالبو ڪيو ويو.
ملاقات ۾ ايراني هٿياربند فوج جي مڪمل حمايت جي عزم کي ورجايو ويو. ان کان علاوه ميمبرن هڪ خاص ڳالهين واري ڪميشن جوڙڻ جي به تجويز ڏني جيڪا مستقبل جي سفارتي حڪمت عملي ۽ عالمي ڳالهين بابت سفارشون پيش ڪندي.
سياسي مبصرن موجب ايراني پارليامينٽ جي هن اجلاس کي تازي جنگ کانپوءِ ايران جي اندروني سياسي رخ ۽ مستقبل جي پرڏيهي پاليسي جي حوالي سان هڪ اهم پيش رفت قرار ڏنو پيو وڃي. ماهرن جو چوڻ آهي ته پارليامينٽ ۾ پيش ڪيل مطالبا ايندڙ ڏينهن ۾ ايران ۽ آمريڪا جي لاڳاپن تي اثرانداز ٿي سگهن ٿا.
