واشنگٽن:
آمريڪي انٽيليجنس ايجنسيون ان ڳالهه جو تفصيلي جائزو وٺي رهيون آهن ته جيڪڏهن صدر ڊونلڊ ٽرمپ ايران سان هلندڙ ٻن مهينن کان جاري جنگ ۾ هڪ طرفي فتح جو اعلان ڪري ٿو ته تهران جو ردعمل ڇا ٿي سگهي ٿو. معاملي کان واقف ذريعن موجب اهو تجزيو اعليٰ اختيارين جي هدايتن تي ڪيو پيو وڃي.
عرب ميڊيا ذريعن موجب آمريڪي انتظاميه جنگ ۾ اوچتو گهٽتائي جي امڪان تي به غور ڪري رهي آهي ته ان جا سياسي اثر ڪهڙا هوندا، خاص طور تي اهڙي وقت ۾ جڏهن تڪرار وائيٽ هائوس لاءِ اندروني دٻاءُ جو ذريعو بڻجي رهيو آهي ۽ ايندڙ مڊٽرم چونڊن تي به اثر انداز ٿي سگهي ٿو.
انٽيليجنس تجزيي موجب جيڪڏهن آمريڪا اوچتو فتح جو اعلان ڪري ٿو ۽ خطي ۾ پنهنجي فوجي موجودگي کي گهٽائي ٿو ته ايران ان کي پنهنجي ڪاميابي طور پيش ڪري سگهي ٿو.
تنهن هوندي، جيڪڏهن فتح جي اعلان جي باوجود آمريڪي فوجن جي تعیناتي جاري رکي ٿي، تهران ان کي هڪ ممڪن ڳالهين جي حڪمت عملي طور سمجهي سگهي ٿو، پر اهو جنگ جي فوري طور تي ختم ٿيڻ جي اميد کي گهٽائي ڇڏيندو.
سي آءِ اي ان معاملي تي سڌي ريت تبصرو ڪرڻ کان پاسو ڪيو آهي، جڏهن ته ڊائريڪٽر آف نيشنل انٽيليجنس جي آفيس به ان معاملي تي خاموشي اختيار ڪئي آهي.
ٻئي طرف وائيٽ هائوس جي ترجمان اينا ڪيلي چيو آهي ته آمريڪا ايران سان رابطي ۾ آهي پر جلدبازي ۾ ڪو معاهدو نه ٿيندو.
هن چيو ته صدر ٽرمپ رڳو ڪنهن اهڙي معاهدي تي راضي ٿيندو جيڪو آمريڪي قومي سلامتي جي مفاد ۾ هجي ۽ هن واضح ڪيو آهي ته ايران کي ايٽمي هٿيار حاصل ڪرڻ جي اجازت نه ٿي ڏئي سگهجي.
