واشنگٽن:
آمريڪي صدر ڊونلڊ ٽرمپ چيو آهي ته آمريڪا ڪجهه ڏينهن تائين ايران جي جواب جو انتظار ڪندو ۽ حتمي معاهدو ٿيڻ تائين تهران سان ڪابه رعايت نه ڪئي ويندي.
ميڊيا جي نمائندن سان ڳالهائيندي آمريڪي صدر چيو ته واشنگٽن ايران کان واضح ۽ قابل قبول جواب چاهي ٿو.
هن دعويٰ ڪئي ته ايراني شخصيتون جن سان آمريڪي عملدار ڳالهه ٻولهه ڪري رهيا آهن انهن شين کي معقول انداز ۾ ڏسي رهيا آهن.
ڊونلڊ ٽرمپ هڪ ڀيرو ٻيهر چيو آهي ته ايران ڊيل تي سنجيده نظر اچي ٿو، پر خبردار ڪيو ته جيڪڏهن ڳالهيون ناڪام ٿيون ته آمريڪا ٻيهر سخت قدم کڻي سگهي ٿو.
آمريڪي صدر موجب ايران هن وقت سخت معاشي دٻاءُ ۽ اندروني بدامني کي منهن ڏئي رهيو آهي.
هن چيو ته ايراني عوام مشڪلاتن کي منهن ڏئي رهيو آهي ۽ اها صورتحال تهران کي ڳالهين جي طرف وٺي رهي آهي.
ٽرمپ اهو به چيو ته ايران سان جاري ڇڪتاڻ گهڻي عرصي کان نه رهي آهي ۽ جنگبندي گهڻي وقت کان جاري آهي.
هن چيو ته آبنائي هرمز جي صورتحال بهتر ٿي سگهي ٿي پر آمريڪا ڪنهن به قسم جي تڪڙ ۾ ناهي.
پنهنجي خطاب ۾ آمريڪي صدر دعويٰ ڪئي ته ايران کي تمام گهڻو نقصان پهتو آهي ۽ ايندڙ ڏينهن ۾ وڌيڪ اڳڀرائي ٿيندي نظر اچي سگهي ٿي، جڏهن ته آمريڪا معاهدي جي حوالي سان غور ويچار سان اڳتي وڌندو.
