خيبرپختونخواهه جي نئين مالي سال جي 50 ارب کان وڌيڪ خساري واري بجيٽ اڄ پيش ڪئي ويندي، خيبرپختونخواهه جو وڏو وزير سهيل آفريدي پاڻ بجيٽ پيش ڪندو. اسيمبلي جي ضابطن موجب اسيمبلي جي ڪارروائي ۾ صرف چونڊيل ميمبر حصو وٺي سگهن ٿا، ناڻي وارو صلاحڪار مزمل اسلم چونڊيل ميمبر ناهي، تنهن ڪري وڏو وزير سهيل آفريدي اڄ بجيٽ پيش ڪندو. تفصيل موجب بجيٽ جو ڪل تخمينو 2 هزار 170 ارب کان وڌيڪ آهي، بجيٽ ۾ ڪو به نئون ٽيڪس نه لڳايو ويو آهي پر ٽيڪس جي شرح ۾ تبديلي جو امڪان آهي. صوبائي حڪومت جي ذريعن موجب ايندڙ سال ترقياتي پروگرام جو ڪاٿو 519 ارب کان وڌيڪ لڳايو ويو آهي، صوبائي حڪومت پنهنجي وسيلن مان ترقياتي پروگرام تي 235 ارب خرچ ڪندي. عالمي امدادي ادارن جي ترقياتي منصوبن تي 150 ارب کان وڌيڪ رقم خرچ ڪئي ويندي. اهڙي طرح انٽيگريٽڊ ڊسٽرڪٽ ڊولپمينٽ پروگرام جو ڪاٿو 27 ارب رپيا ۽ ايڪسيلريٽڊ ڊولپمينٽ پروگرام جو ڪاٿو 52 ارب رپيا لڳايو ويو آهي، حڪومتن لاءِ مجموعي طور 55 ارب رپيا رکڻ جي سفارش ڪئي وئي آهي. سرڪاري ملازمن جي پگهار ۽ پينشن ۾ 7 سيڪڙو واڌ جي تجويز ڏني وئي آهي جڏهن ته ملازمن لاءِ 2022 ۽ 2025 جي ايڊهاڪ رليف کي ضم ڪرڻ جي به تجويز ڏني وئي آهي. وفاق کي 1 هزار 443 ارب رپيا ملڻ جو امڪان آهي جڏهن ته هائيڊرو پاور مان خالص منافعي جي مد ۾ 105 ارب کان وڌيڪ حاصل ٿيڻ جو امڪان آهي. صوبي جي پنهنجي وسيلن مان آمدني جو اندازو 180 ارب رپيا آهي. ذريعن موجب صحت ڪارڊ لاءِ مختص فنڊن ۾ واڌ، نوجوانن جي روزگار لاءِ 50 ارب رپين جا فنڊ مختص ڪرڻ ۽ اليڪٽرڪ ٿري ويلر خريد ڪرڻ لاءِ قرض جي اسڪيم متعارف ڪرائڻ جي تجويز آهي.
Source link
Leave a Comment Leave a Comment
