اسلام آباد:
وزيراعظم شهباز شريف توانائي جي بچت جي مقصد لاءِ لاڳو ڪيل اڳوڻن سادگي واري قدم کي ختم ڪرڻ جي منظوري ڏئي ڇڏي آهي.
هڪ خانگي ٽي وي جي رپورٽ موجب ڪابينا ڊويزن ان حوالي سان باضابطا نوٽيفڪيشن جاري ڪري ڇڏيو آهي، جنهن موجب حڪومتي سطح تي تيل جي بچت جا قدم واپس وٺي ڇڏيا آهن.
تازي حڪم موجب سرڪاري ملازمن جي جمعي جي موڪل ختم ڪئي وئي آهي، جڏهن ته آفيسرن کي پيٽرول جي مڪمل سهولت ۽ 60 سيڪڙو سرڪاري گاڏين جي ٻيهر استعمال جي اجازت ڏني وئي آهي.
ٻئي طرف تجارتي مرڪزن ۽ ڪاروباري سرگرمين بابت وقت جي پابندي برقرار رهندي.
ان حوالي سان جاري ڪيل نوٽيفڪيشن موجب دڪان، مارڪيٽون ۽ شاپنگ مالز رات 9 وڳي بند ڪرڻا پوندا، جڏهن ته شادي هالن کي رات 10 وڳي تائين تقريبون پوريون ڪرڻيون پونديون.
ريسٽورنٽ ۽ ڪيفي به رات 11 وڳي بند ٿي ويندا، جيتوڻيڪ گھر جي ترسيل ۽ کڻي وڃڻ هن پابندي کان مستثنيٰ هوندا.
ان کان علاوه دوائون، اسپتالون، ليبارٽريون، بيڪريون، کير جا دڪان ۽ تندور ڪم جي ڪلاڪن کان مستثنیٰ هوندا. اهڙي طرح پيٽرول پمپ، سي اين جي اسٽيشنز، اليڪٽرڪ گاڏين جا چارجنگ پوائنٽس، جم، اسپورٽس ڪلب، آئي ٽي ڪمپنيون ۽ ڪال سينٽر به معمول موجب کليل رهندا.
ياد رهي ته 9 مارچ 2026 کان اڳ لاڳو ڪيل سادگي جا ٻيا قدم لاڳو ٿيندا رهندا.
