گڏيل قومن جي سلامتي ڪائونسل افغانستان ۾ دهشتگرد گروپن جي موجودگي تي سخت ڳڻتي جو اظهار ڪيو آهي.
افغان سرزمين تي دهشتگردن جي موجودگي ۽ طالبان حڪومت پاران سندن سرپرستي هڪ ڀيرو ٻيهر عالمي سطح تي بي نقاب ٿي وئي آهي ۽ سلامتي ڪائونسل طالبان حڪومت تي زور ڏنو آهي ته هو دهشتگردي جي خاتمي ۽ عورتن کي برابري جا حق فراهم ڪرڻ لاءِ پنهنجا واعدا پورا ڪري.
سلامتي ڪائونسل افغانستان خلاف ٺهراءُ پاس ڪري يوناما جي مدي ۾ 17 جون 2027 تائين واڌ ڪري ڇڏي.
پاڪستاني وفد افغانستان کي درپيش دهشتگردي جي خطرن کان آگاهه ڪيو ۽ چيو ته فتنا الخوارج ۽ فتنا الهندوستان سميت ٻيا عالمي دهشتگرد گروپ افغانستان ۾ سرگرم آهن ۽ سرحد پار دهشتگردي ۾ ملوث آهن.
آمريڪا جي مستقل نمائندي طالبان حڪومت کي تنقيد جو نشانو بڻائيندي چيو ته طالبان حڪومت کي دهشتگردي جي خاتمي جي ذميواري پوري ڪرڻ گهرجي، يرغمال سفارتڪاري ختم ڪرڻ ۽ عورتن جي حقن جي ڀڃڪڙي بند ڪرڻ گهرجي.
لائبريا جي سفير طالبان حڪومت کي آگاهه ڪندي چيو ته افغانستان کي پاڙيسري ملڪن جي امن ۽ سلامتي کي خطري ۾ نه وجهڻ گهرجي ۽ دهشتگرد تنظيمن کي پنهنجي سرزمين استعمال ڪرڻ جي اجازت نه ڏيڻ گهرجي.
افغان وفد هرات ۾ مظاهرين تي فائرنگ جي مذمت ڪندي عورتن جي حقن جي صورتحال تي ڳڻتي جو اظهار ڪيو.
عالمي ماهرن موجب طالبان حڪومت دوحا ۾ واعدو ڪيو هو ته هو افغان سرزمين کي ڪنهن به ملڪ خلاف استعمال ٿيڻ نه ڏيندا، پر صورتحال ان جي ابتڙ آهي.
ماهرن جو چوڻ آهي ته طالبان حڪومت وٽ عوامي مسئلن جو ڪو به سياسي حل ناهي، اها اندروني تنقيد ۽ احتجاج کي دٻائڻ لاءِ وحشيانه طاقت جو استعمال ڪري رهي آهي.
