ڪراچي:
سنڌ حڪومت ڪراچي جي اهم ريڊ لائين منصوبي کي تيزي سان اڳتي وڌائڻ جو فيصلو ڪيو آهي، سنڌ جي وڏي وزير سيد مراد علي شاهه جي هدايت تي ايف ڊبليو او منصوبي جو روڪيل ڪم ٻيهر شروع ڪري ڇڏيو آهي.
صوبائي حڪومت هدايت ڪئي آهي ته شهرين کي درپيش مسئلا حل ڪرڻ لاءِ مخلوط ٽريفڪ ڪوريڊور ۽ ڊرينيج جو ڪم 90 ڏينهن اندر مڪمل ڪيو وڃي. اهو فيصلو سنڌ حڪومت پاران پراڻي ڪانٽريڪٽر جي آفيس سيل ڪرڻ کانپوءِ ڪيو ويو آهي.
سنڌ حڪومت ريڊ لائين منصوبي کي هنگامي بنيادن تي ايف ڊبليو او حوالي ڪري ڇڏيو آهي، سنڌ جي وڏي وزير سيد مراد علي شاهه اعلان ڪيو آهي ته ڪم عيد جي موڪلن ۾ به جاري رهندو ته جيئن منصوبي کي ٽن مهينن ۾ مڪمل ڪري شهرين کي رليف ملي سگهي.
سرڪاري ذريعن جو چوڻ آهي ته منصوبي جي لاٽ 2 جي ٻنهي پاسن تي ڪم ٽن مهينن ۾ مڪمل ڪيو ويندو، خاص ڪري انهن هنڌن تي جتي عوام متاثر ٿئي ٿو، هنگامي بنيادن تي.
ذريعن موجب نمائش چورنگي کان موسميات چورنگي تائين ريڊ لائين منصوبي جي ٻنهي پاسن تي واٽر لائين، سروس روڊ، ڊرينيج لائينن جو ڪم جولاءِ جي آخر تائين مڪمل ڪيو ويندو.
ذريعن موجب سنڌ جي وڏي وزير ايف ڊبليو او کي مئي يا جون ۾ ڪم مڪمل ڪرڻ جو چيو، جنهن تي ايف ڊبليو او ٽن مهينن ۾ ڪم مڪمل ڪرڻ جو يقين ڏياريو.
ڪراچي جي ميئر مرتضيٰ وهاب سوشل ميڊيا پليٽ فارم ايڪس تي بيان جاري ڪندي چيو ته ايف ڊبليو او آچر کان يونيورسٽي روڊ تي ڪم ٻيهر شروع ڪري ڇڏيو آهي.
سنڌ جي وڏي وزير مخلوط ٽريفڪ ڪوريڊور ۽ ڊرين کي 90 ڏينهن اندر مڪمل ڪرڻ جي هدايت ڪئي آهي.
ٻئي طرف سنڌ جي وڏي وزير سيد مراد علي شاهه يونيورسٽي روڊ جي تعميراتي ڪم ۾ دير تي شهرين کان معذرت ڪندي چيو آهي ته 3 مهينن اندر مخلوط ٽريفڪ لين بحال ڪئي ويندي.
سنڌ جي وڏي وزير چيو ته هو ڪراچي جي شهرين جي تڪليفن جو ازالو ڪندو ۽ ڪوشش ڪندو ته ڪم جلد کان جلد مڪمل ڪيو وڃي. هن اها ڳالهه بي آر ٽي ريڊ لائين جي دوري دوران ميڊيا سان ڳالهائيندي چئي.
هن چيو ته بي آر ٽي ريڊ لائين لاٽ 2 جي مين ڪوريڊور لاءِ ٽينڈر ٻيهر جاري ڪيا ويندا.
