ڪراچي:
سنڌ حڪومت سڄي صوبي ۾ ميٽرڪ ۽ انٽر جي سالياني امتحانن جا نتيجا جاري ڪرڻ جي تاريخن جو اعلان ڪري ڇڏيو آهي.
فيصلي موجب ميٽرڪ جا نتيجا 10 جولاءِ جڏهن ته انٽر جا نتيجا 31 جولاءِ تي جاري ڪيا ويندا.
اهو فيصلو يونيورسٽين ۽ تعليمي بورڊن جي صوبائي وزير محمد اسماعيل راهو جي صدارت هيٺ هڪ اهم اجلاس ۾ ڪيو ويو، جنهن ۾ سيڪريٽري يونيورسٽيز محمد عباس بلوچ ۽ صوبي جي سمورن تعليمي بورڊن جي چيئرمينن شرڪت ڪئي. اجلاس ۾ صوبي ۾ مڪمل ٿيل ميٽرڪ ۽ انٽر جي سالياني امتحانن جو تفصيلي جائزو ورتو ويو.
اجلاس دوران سمورن تعليمي بورڊز پنهنجي پنهنجي ڊويزنن ۾ هلندڙ امتحانن بابت تفصيلي بريفنگ ڏني.
ان موقعي تي محمد اسماعيل راهو چيو ته سنڌ جي سمورن ڊويزنن ۾ ميٽرڪ جا نتيجا 10 جولاءِ تائين جاري ڪيا ويندا، جڏهن ته انٽر جا نتيجا 31 جولاءِ تائين جاري ڪيا ويندا ته جيئن شاگردن کي اعليٰ تعليمي ادارن ۾ بروقت داخلا جي سهولت ملي سگهي.
يونيورسٽين واري وزير چيو ته حڪومت سمورن تعليمي بورڊن ۾ شفافيت، ميرٽ ۽ امتحاني نظام جي بهتري لاءِ هر ممڪن سهڪار ڪندي. اجلاس ۾ چيئرمين بريفنگ ڏيندي ٻڌايو ته ڪلاس 9 ۽ 11 جا نتيجا به 31 آگسٽ تائين جاري ڪيا ويندا.
بريفنگ دوران ٻڌايو ويو ته سکر ڊويزن ۾ امتحانن دوران صفر ڪارڪردگي ڏيکاريندڙ ٽيمن جون ڊيوٽيون منسوخ ڪيون ويون آهن. سيڪريٽري يونيورسٽيز محمد عباس بلوچ اجلاس کي ٻڌايو ته ڪراچي ۾ امتحانن دوران قلم 144 جي ڀڃڪڙي تي ڪيترن ئي ماڻهن خلاف ڪيس داخل ڪيا ويا آهن.
اجلاس ۾ ڪراچي ڊويزن جي تعليمي بورڊ جي چيئرمين فقير محمد لاکو ٻڌايو ته ڪراچي ۾ انٽرميڊيٽ جا امتحان 15 جون تي ختم ٿيندا.
