بالي ووڊ اداڪارا ڪنگنا رناوت هڪ ڀيرو ٻيهر سماجي مسئلن تي کليل نموني ڳالهايو آهي، نوجوان ڇوڪرين کي صلاح ڏني آهي ته هو شادي کان اڳ ڪيريئر ۽ مالي خودمختاري تي ڌيان ڏين. 39 ورهين جي اداڪارا ڏاج ۽ گهريلو هراساني جي تازي واقعن تي ڳڻتي جو اظهار ڪندي پنهنجي انسٽاگرام ڪهاڻي ۾ لکيو ته اڄ جي سماج ۾ اڪثر ڇوڪرين کي شادي کانپوءِ مشڪلاتن کي منهن ڏيڻو پوي ٿو ۽ ڪڏهن ڪڏهن انهن کي پنهنجو خرچ به پورو ڪرڻ لاءِ جدوجهد ڪرڻي پوندي آهي. سندس چوڻ آهي ته اهڙي صورتحال کان بچڻ لاءِ عورتن کي پهريان پاڻ کي مضبوط ۽ خودمختيار بڻائڻ گهرجي. پنهنجي پيغام ۾ ڪنگنا رناوت واضح ڪيو ته عورتن کي گهرجي ته هو پنهنجي پروفيشنل زندگي کي اوليت ڏين ۽ ڪنهن به رشتي ۾ داخل ٿيڻ کان پهريان ان ڳالهه کي يقيني بڻائين ته هو مالي طور تي ڪنهن تي به انحصار نه ڪن. هن چيو ته شاديءَ جو فيصلو تڏهن ئي ٿيڻ گهرجي جڏهن عورت مڪمل طور تي خودمختيار هجي ۽ پنهنجي ذميواري کڻڻ جي قابل هجي. اداڪارا جو اهو بيان هڪ اهڙي وقت ۾ سامهون آيو آهي جڏهن ڀارت ۾ ڏاج ۽ گهريلو تشدد سان لاڳاپيل هڪ افسوسناڪ واقعو ميڊيا جي توجه جو مرڪز بڻجي ويو آهي، جنهن هڪ ڀيرو ٻيهر ان معاملي تي بحث ڇڙي ڇڏيو آهي.
Source link
Leave a Comment Leave a Comment
