راولپنڊي:
پي ٽي آءِ جي باني ڀيڻ نورين نيازي جي تڪراري بيان تي چيئرمين پي ٽي آءِ بئريسٽر گوهر خان واضح ڪيو ته نورين نيازي جو بيان پارٽي پاليسي نه پر سندس ذاتي راءِ آهي.
راولپنڊي ۾ ميڊيا سان ڳالهائيندي بئريسٽر گوهر خان چيو ته سندس ڄاڻ موجب نورين نيازي جو بيان ٽي مهينا پراڻو آهي، اهي سندس ذاتي خيال آهن، پارٽي پاليسي جو حصو نه آهن. هن سوال ڪيو ته ايتري عرصي کانپوءِ بيان ٻيهر ڇو آندو ويو ۽ چيو ته تڪراري معاملن کي ميڊيا تي نه آندو وڃي.
هن چيو ته حق جي جنگ ۾ پاڪستان جي ڪاميابي الله تعاليٰ جو فضل آهي، پوري دنيا پاڪستان جي ڪاميابي ڏٺو ۽ هر پاڪستاني کي ان تي فخر آهي. سندس چوڻ هو ته پاڪستان جو دفاع مضبوط آهي، ڪو به دشمن پاڪستان کي شڪست نٿو ڏئي سگهي ۽ جيڪڏهن ڪنهن ٻيهر دشمني جي ڪوشش ڪئي ته کين اڳ کان وڌيڪ سخت جواب ڏنو ويندو.
بئريسٽر گوهر چيو ته ملڪ ۾ ورهاست اڳي ئي وڌي چڪي آهي، اچو ته پراڻا مسئلا ٻيهر نه ورجايون پر صورتحال کي بهتر بڻائڻ جي ڪوشش ڪريون. هن چيو ته پاڪ فوج جي قربانين ۽ شهيدن تي خاموش نه رهڻ گهرجي، تقرير ۾ ڪڏهن ڪڏهن جوش ۾ لفظ به نڪرندا آهن پر ڪجهه مسئلا اهڙا به هوندا آهن جن کي نه ڇڪڻ گهرجي.
هن نورين نيازي کي نوٽيس موڪلڻ يا هراسان ڪرڻ جي مخالفت ڪندي چيو ته بيان سان پاڪستان جو دفاع ڪمزور نه ٿيندو. مولانا فضل الرحمان جي بيان تي رد عمل ڏيندي هن چيو ته اهو معاملو به هاڻي بند ٿيڻ گهرجي ڇو ته وضاحت اچي وئي آهي.
دهشتگردي جي حوالي سان بئريسٽر گوهر چيو ته پارٽي جو موقف واضح آهي، دهشتگردي ملڪ جي لاءِ برائي آهي، دهشتگرد جتي به هجن خلاف ڪارروائي ڪئي وڃي، دهشتگردي جي خاتمي سان ئي ملڪ ۾ ترقي ۽ استحڪام ايندو.
هن وڌيڪ چيو ته آزاد ڪشمير جون چونڊون ٽن مرحلن ۾ ملتوي ڪيون ويون آهن، سندس چوڻ هو ته بائيڪاٽ جي فيصلي تي نظرثاني جي راءِ ضرور هئي، پر اتفاق راءِ نه ٿيڻ سبب بائيڪاٽ جو فيصلو في الحال برقرار آهي، جڏهن ته صورتحال بهتر ٿي ته ان فيصلي تي نظرثاني ڪري سگهجي ٿي.
اسٽينڊنگ ڪميٽين ۽ جڊيشل ڪميشن جي حوالي سان هن چيو ته پارٽي جو بائيڪاٽ اڃا تائين برقرار آهي.
ڳالهين جي حوالي سان هن چيو ته ڳالهين جو عمل اڃا شروع نه ٿيو آهي، رڳو پيشڪش جي حد تائين ڳالهه ٻولهه ٿي، جيڪڏهن باقاعده ملاقات ٿئي ها ته ڪجهه معاملا طئي ٿي وڃن ها، خواهش آهي ته سياسي مسئلن جو ڊگهي مدي تائين سياسي حل ڳوليو وڃي ته جيئن ملڪ موجوده صورتحال مان نڪري سگهي.
ڳالهه ٻولهه جي آخر ۾ بئريسٽر گوهر خان چيو ته پي ٽي آءِ جي باني جون ڀينرون سياست ۾ نه آهن ۽ نه ئي پارٽي ۾ ڪو عهدو رکن ٿيون، ان ڪري سندن ذاتي بيان کي پارٽي جو موقف نه سمجهيو وڃي. هن چيو ته اهڙن بيانن کي تناظر کان ٻاهر ڪڍڻ سان غير ضروري تڪرار پيدا ٿئي ٿو، ان ڪري بهتر آهي ته معاملي کي هتي ئي ختم ڪري اڳتي وڌو وڃي.
